नामको मात्र अनुगमन गरिँदा औषधी पसललाई जहिल्यै छुट

भक्तिविलास पोखरेल 

गाईघाट, चैत २२ गते । दैनिक उपभोग्य वस्तु तथा औषधी पसलहरूमा विगत बर्सहरूमा झैँ यो वर्ष पनि जिल्ला प्रशासन कार्यालय उदयपुरले बजार अनुगमन गरेको छ । गाईघाट बजारमा नियम विपरीत सञ्चालित विभिन्न औषधी पसल तथा फार्मेसीलाई विगत बर्सहरूमा जस्तै यो वर्ष पनि सचेत गराएर छोडिएको छ ।

व्यवसायीहरूले व्यापार व्यवसाय सञ्चालन गर्दा पालना गर्नुपर्ने ऐन नियमहरू पटक पटक उल्लङ्घन गरे पनि हरेक वर्ष गरिने अनुगमनले सदैभरि पहिलो पटक भन्दै सचेतना गर्दै छोड्दै गर्ने गरिएको गाईघाटका आम उपभोक्ताहरूको आरोप छ । त्यति मात्र हैन औषधी पसलबाट म्याद गुज्रेका सामाग्री बरामद गर्दा समेत सचेत मात्र गराएर छाडिएको भन्दै उपभोक्तहरुले चरम असन्तुष्टि जनाएका छन् ।

अनुमति विना नै सञ्चालित कतिपय फार्मेसीहरूलाई समेत प्रशासनले केही कारबाही नगरी छाडिएकोले कानुन मिचेर व्यवसाय गर्ने हरूको मनोबल बढेको गाईघाट बजारका एक औषधी व्यवसायीले बताएका छन् । 

बिहीबार जिल्ला प्रशासन कार्यालय उदयपुरका सहायक प्रमुख जिल्ला अधिकारी विक्रमप्रसाद पाण्डे र प्रमुख प्रशासकीय अधिकृत सन्तोष भट्टराईको सक्रियतामा गाईघाट बजारमा गरिएको अनुगमन टोलीले छ वटा फार्मेसी तथा औषधी पसललाई सुधारका लागि सचेत गराएर छोडी दिएपछि बजारमा यस्तो जनगुनासो आएको हो । उद्योग वाणिज्य सङ्घलाई जानकारी गराएर अनुगमन गरिने गर्नले प्रभावकारितामा समेत प्रश्न उठ्ने गरेको नागरिक अगुवाहरूको गुनासो छ । सङ्घले अघिल्लो दिन नै सबै व्यवसायीलाई खबर गरेर खराब सामाग्रीहरू लुकाउने र पछि पुनः बिक्री गर्ने गरेको आरोप छ । 

गाईघाट बजारमा रहेका करिब एक दर्जन फार्मेसीलाई गरिएको अनुगममा छ वटाले नियम विपरीत सञ्चालन गरेको पाइएपछि पहिलो पटक सुधार गर्ने मौका दिई सचेत गराइएको सहायक प्रमुख जिल्ला अधिकारी पाण्डेले बताउनुभयो । 

पाण्डेकै सक्रियतामा जिल्ला प्रशासन कार्यालय सहित जिल्ला प्रहरी कार्यालय उदयपुर, घरेलु तथा साना उद्योग कार्यालय उदयपुर, करदाता सेवा कार्यालय गाईघाट, स्वास्थ्य कार्यालय, जिल्ला अस्पताल उदयपुर, जिल्ला आयुर्वेद स्वास्थ्य केन्द्र, त्रियुगा नगरपालिका र उद्योग वाणिज्य सङ्घसमेतको उपस्थितिमा अनुगमन गरिएको हो ।

अनुगमनका क्रममा सरकारी मापदण्ड अनुसार हुनुपर्ने सरसफाइ नभएको, दर्ता भएको भन्दा फरक ठाउँमा सञ्चालन रहेको, औषधीको नाममा खाद्य सामाग्री व्यापार गरेको, म्याद गुज्रेको औषधी र अनुमति बिनै सञ्चालन जस्ता गल्ती गर्ने फार्मेसीलाईसमेत सचेत गराइएको छ । 

विगतमा औषधी व्यवस्था विभागबाट मात्र अनुगमन गर्ने गरिएकोमा यो वर्ष पहिलोपल्ट जिल्ला प्रशासन कार्यालयको नेतृत्वमा औषधी पसलहरूमा अनुगमन गरिएकोले कर चुक्ता नगरिएका,तापक्रम अनुकूल औषधीहरू भण्डारण नगरिएका,स्थानीय तहमा दर्ता नगरिएका आदि कुराहरूलाई कानुन अनुसार सात दिन भित्र चुस्त दुरुस्त बनाउन भनी सचेत गराइएको सहायक प्रमुख जिल्ला अधिकारी पाण्डेले बताउनुभयो । 

यसअघि कसले के गथ्र्याे थाहा भएन तर जिल्ला प्रशासनबाट पहिलोपल्ट अनुगमन भएकोले व्यवसायीलाई आफ्नो गल्तीको महसुस गराउँदै तत्कालै सुधार गर्न अनुगमन टोलीले निर्देशन दिएको छ । पुन गल्ती दोहोरीमा सिधै कारबाहीको प्रक्रियामा अघि बढाइने सहायक प्रजिअ पाण्डेले बताउनुभयो ।