नेपाल र थाइल्यान्ड असल मित्र

कहिल्यै पराधिन नभएका नेपाल र थाइल्यान्ड असल मित्र हुन् । दुई देशबिचको सम्बन्ध मैत्रीपूर्ण छ । यो सम्बन्ध अझ प्रगाढ बनाउने प्रयास भइरहेको छ । यसै सन्दर्भमा प्रधानमन्त्री केपी शर्मा ओली चारदिवसीय औपचारिक भ्रमणका सिलसिलामा थाइल्यान्डमा हुनुहुन्छ । प्रधानमन्त्री ओली बहुक्षेत्रीय प्राविधिक तथा आर्थिक सहयोगका लागि बङ्गालका खाडीको प्रयास (बिम्स्टेक) को छैटौँ शिखर सम्मेलनमा भाग लिने क्रममा थाइल्यान्ड जानुभएको हो । नेपालका प्रधानमन्त्रीबाट थाइल्यान्डमा भएको यो पहिलो औपचारिक भ्रमण हो । प्रधानमन्त्रीको भ्रमणबाट नेपाल र थाइल्यान्डबिचको आपसी सम्बन्ध नयाँ उचाइमा पुग्ने विश्वास गरिएको छ । थाइल्यान्डका समकक्षी पे थोङ थान सिनावात्रासँगको भेटवार्तापछि बैङ्ककमा आयोजित संयुक्त पत्रकार सम्मेलनमा प्रधानमन्त्री ओलीले भ्रमणबाट दुई मुलुकबिच संस्कृति, पर्यटन, शिक्षा, ऊर्जालगायतका क्षेत्रमा सहकार्य अभिवृद्धि हुने विश्वास व्यक्त गर्नुभएको छ । नेपाल र थाइल्यान्डबिच कूटनीतिक सम्बन्ध स्थापना भएको ६५ वर्ष पूरा भएको छ । 

प्रधानमन्त्री ओलीले थाइल्यान्डका लगानीकर्तालाई नेपालमा लगानी गर्न आग्रह गर्नुभएको छ । प्रधानमन्त्रीको आग्रहपछि होटेल व्यवसाय तथा हवाई सेवा जस्ता पर्यटन क्षेत्रमा थाइल्यान्डको लगानी र व्यापारका विषयले आगामी दिनमा प्राथमिकता पाउने विश्वास गरिएको छ । नेपाल र थाइल्यान्डबिच कृषि, व्यापार, पर्यटन, संस्कृतिको गहिरो सम्बन्ध कायम छ । थाइल्यान्डका समकक्षी पेसँग प्रतिनिधिमण्डलस्तरीय द्विपक्षीय बैठक भयो । द्विपक्षीय बैठक सकिएपछि दुई देशका प्रधानमन्त्रीको उपस्थितिमा नेपाल र थाइल्यान्डबिच आठ वटा समझदारी तथा सम्झौतापत्रमा हस्ताक्षर भयो । तीमध्ये दुई वटा सरकारी निकायबिच र छ वटा गैरसरकारी निकायहरूबिच हस्ताक्षर भएको हो । भ्रमणका सिलसिलामा प्रधानमन्त्री ओलीले थाई नरेश महावजिरालोङकोर्नसँग पनि शिष्टाचार भेटवार्ता गरी दुई देशबिचको सम्बन्ध अरू प्रगाढ बनाउने प्रयास गर्नुभयो । यसैबिच प्रधानमन्त्री ओलीले बिहीबार थाइल्यान्डका प्रतिष्ठित व्यवसायीहरूसँग भेटघाट र छलफल गर्नुभयो । उहाँले सोही दिन एसियन इन्स्टिच्युट अफ टेक्नोलोजीमा आयोजित कार्यक्रमलाई सम्बोधन गर्नुभयो । प्रधानमन्त्री ओली मेरिटाइम ट्रान्सपोर्ट कोअपरेसन अग्रिमेन्टमा हुने हस्ताक्षर समारोहमा सहभागी हुनुभयो ।

नेपाल र थाइल्यान्डबिच कूटनीतिक सम्बन्ध स्थापना भएको १० वर्षपछि सन् १९६९ मा एकअर्काको देशमा दूतावास स्थापना भएका थिए । बर्र्सेनि ठुलो सङ्ख्यामा बौद्ध धर्मावलम्बी थाइल्यान्डबाट नेपाल घुम्न आउने गर्छन् । नेपाल घुम्न आउने अधिकांश थाई नागरिकको गन्तव्य गौतम बुद्धको जन्मस्थल लुम्बिनी हुने गरेको छ । प्रधानमन्त्री ओलीको यो भ्रमण र बिम्स्टेक शिखर सम्मेलनको सहभागिताले थाईलगायत बिम्स्टेक सदस्यराष्ट्रबाट धेरै पर्यटकले नेपाल भ्रमण गर्ने आशा एवं विश्वास व्यक्त गरिएको छ । सन् १९५९ नोभेम्बर ३० मा नेपाल र थाइल्यान्डबिच कूटनीतिक सम्बन्ध गाँसिएको थियो । त्यसयताका ६५ वर्षमा थाइल्यान्डका प्रधानमन्त्रीले एक पटक मात्र नेपाल भ्रमण गर्नुभएको थियो । यसबाहेक दुई देशबिच उच्चस्तरीय भ्रमण हुन सकेको थिएन । थाइल्यान्डका तत्कालीन प्रधानमन्त्री प्रयुत चान–ओ–चाले सन् २०१८ मा नेपालको भ्रमण गर्नुभएको थियो । उहाँ बिम्स्टेकको चौथो शिखर सम्मेलनमा सहभागी हुन काठमाडौँ आउनुभएको थियो । बिम्स्टेकको छैटौँ शिखर सम्मेलन थाइल्यान्डमा अप्रिल २ देखि ४ सम्म जारी छ ।  प्रधानमन्त्री ओलीले शुक्रबार बिम्स्टेक शिखर सम्मेलनलाई सम्बोधन गर्नुहुने कार्यक्रम छ । सन् १९९७ को जुन ६ मा बैङ्कक घोषणापत्रमा हस्ताक्षर गरी स्थापना भएको बिम्स्टेकमा दक्षिण र दक्षिणपूर्वी एसियाका बङ्गलादेश, भुटान, भारत, म्यानमार, नेपाल, श्रीलङ्का र थाइल्यान्ड गरी सात देश सदस्य छन् । बैठकमा सातै देशका राष्ट्राध्यक्ष तथा सरकारप्रमुख सहभागी छन् । बिम्स्टेक शिखर सम्मेलन सकिएपछि प्रधानमन्त्री ओलीले भारतीय समकक्षी नरेन्द्र मोदीसँग बैङ्ककमा भेटवार्ता गर्ने कार्यक्रम छ । यसअघि प्रधानमन्त्री ओली र भारतीय समकक्षी मोदीबिच यसै वर्ष अमेरिकाको न्युयोर्कमा राष्ट्रसङ्घ महासभाको साइडलाइनमा भेटवार्ता भएको थियो ।