नेपाली सेनाको उडान उत्कृष्ट लघुचलचित्र

गोरखापत्र समाचारदाता 

काठमाडौँ, चैत २२ गते । नेपाली सेनाले आयोजना गरेको लघुचलचित्र प्रतियोगितामा ‘उडान’ नामक वृत्तचित्र उत्कृष्ट बनेको छ । सैनिक जनसम्पर्क तथा सूचना निर्देशनालयको २३ औँ स्थापान दिवसका अवसरमा आयोजित प्रतियोगितामा उडान प्रथम बनेको हो । रविन तामाङद्वारा निर्देशित उक्त वृत्तचित्रमा हिमाली क्षेत्रका राष्ट्रिय निकुञ्ज क्षेत्र आसपास बसोबास गर्ने स्थानीयले भोग्नु परेका वन्यजन्तुको समस्या र यसले उनीहरूको दैनिकी जनजीवनमा पारेको प्रभावकारे जीवन्त कथा प्रस्तुत गरिएको छ ।

गरिब तथा विपन्न परिवारको खेतीपाती वन्यजन्तुले नष्ट गर्ने र वन्यजन्तुबाट बालीनाली जोगाउन बालबालिकाले दिनहुँ खेतीबाली रुँग्नु पर्दा विद्यालय जान वञ्चित भई बाल शिक्षामा परेको असबारे पनि उत्कृष्ट प्रस्तुति गरिएको छ । वन्यजन्तुबाट बालीनाली जोगाई खेतबारी कुर्न बाध्य ती बालबालिकालाई छुटकारा दिई शिक्षाको पहुँचसम्म पुर्‍याउन निकुञ्ज क्षेत्र सुरक्षार्थ तैनाथ नेपाली सेनाले गरेको प्रयास मार्मिक रूपमा प्रस्तुत गरिएको छ ।

त्यसै गरी लघुचलचित्र अवशेषले दोस्रो स्थान हासिल गरेको छ । सशस्त्र द्वन्द्वका बेला विद्रोही समूहले बेवारिसे अवस्थामा छाडेका विस्फोटक पदार्थसँग खेल्दा बालबालिकाले अकालमा ज्यान गुमाउनु परेको कारुणिक दृश्यलाई मूल कथा बनाइएको छ । वृत्तचित्र सल्युटले तेस्रो स्थान हासिल गरेको छ । दैवी तथा प्राकृतिक प्रकोपमा परेका आमनागरिकको जिउधनको रक्षार्थ नेपाली सेनाले गर्दै आएका विविध कार्य समेटेर तयार गरिएको उक्त चलचित्रले समाजका युवा वर्गलाई राष्ट्र सेवामा लाग्न गरेको प्रयास तथा समाजिक उत्तरदायित्व महसुस गराउन गरेको प्रयासलाई विशेष रूपमा प्रस्तुत गरिएको छ । सैनिक मुख्यालय जङ्गी अड्डामा आयोजित समारोहमा प्रधान सेनापति अशोकराज सिग्देलले उत्कृष्ट प्रतियोगितालाई पुरस्कार तथा प्रमाणपत्र प्रदान गर्नुभयो । समारोहमा नेपाली सेनाको सिपाही–२०८१ का उत्कृष्ट लेखकलाई समेत सम्मानसहित पुरस्कार वितरण गरियो । जसमध्ये नेपाली सेनाका सहसेनानी सुजाता बस्नेतद्वारा लिखित ‘डिजिटल मिडिया र यसले पारेको प्रभाव’ विषयक लेखले प्रथम स्थान हासिल गर्‍यो ।