.jpg)
रमेश विश्वकर्मा
गुल्मी, चैत २१ गते । सामाजिक सुरक्षाअन्तर्गत सरकारले ल्याएको स्वास्थ्य बिमालाई सामाजिक न्यायका आधारमा व्यवस्थित गर्नुपर्ने बताइएको छ । तम्घासमा आयोजित गुल्मी अस्पतालको सेवा प्रवाहको गुणस्तर सुधारका लागि भएको छलफलमा सहभागीहरूले यस्तो बताएका छन् ।
स्वास्थ्य मन्त्रालय लुम्बिनी प्रदेश सरकारबाट गठित कार्यदलबाट भएको सो छलफलमा सहभागीहरूले स्वास्थ्य बिमासँगै अन्य सामाजिक सुरक्षालाई सम्पन्नता आधारमा विभाजन गर्न आवश्यक रहेको बताएका हुन् ।
अस्पतालको सरसफाइमा पनि विशेष ख्याल गर्नुपर्ने सहभागीहरूको धारणा आएको छ । पछिल्लो समय सरकारी अस्पतालहरूमा गुणस्तर वृद्धि भएको छ । गुल्मी अस्पतालको नयाँ भवन निर्माणका लागि पटकपटक म्याद थप गरिएतापनि निर्माण हुन नसकेको निकै ढिलासुस्ती भएको भन्दै सहभागीले चिन्ता व्यक्त गरे । भवन निर्माण सम्पन्न गर्नका लागि सम्बन्धित पक्ष सबैले विशेष ध्यान दिनुपर्ने बताइएको छ ।
अस्पतालमा नागरिकको गुनासो नआउने गरी गुणस्तरीय सेवा प्रदान गर्न आवश्यक रहेको गुल्मीका प्रमुख जिल्ला अधिकारी जनार्दन गौतमले बताउनुभयो । गुणस्तरीय सेवा प्रदानमा विशेषगरी डाक्टरहरुको महत्त्वपूर्ण भूमिका रहने भन्दै उहाँले स्वास्थ्य बिमालाई व्यवस्थित गर्नुपर्ने बताउनुभयो । गुल्मी अस्पतालले आमनागरिकमा भरोसा थपेको छ । अस्पतालको गुणस्तरलाई चुस्तदुरुस्त बनाउने प्रयासमा लागिएको रेसुङ्गा नगरपालिकाका नगर प्रमुख खिलध्वज पन्थीले बताउनुभयो ।
स्वास्थ्य क्षेत्रमा सहि परिणाम दिने गरी नीतिगत सुधार गर्न आवश्यक छ । गुल्मी अस्पतालमा बाल विशेषज्ञ डाक्टर थप गर्ने नागरपालिकाले योजना बनाएको उहाँले बताउनुभयो । स्वास्थ्य क्षेत्रमा सबै गम्भीर हुनुपर्ने जिल्ला समन्वय समिति गुल्मीका प्रमुख द्रोण खत्रीले बताउनुभयो । स्वास्थ्य बिमालाई व्यस्थित गर्न आवश्यक रहेको भन्दै उहाँले विदेश पलायनलाई रोक्न सरकारले विशेष कार्यक्रम ल्याउन आवश्यक रहेको बताउनुभयो ।
स्वास्थ्य क्षेत्रमा देखिएका समस्या समाधानका लागि लुम्बिनी प्रदेश सरकार निरन्तर लागेको लुम्बिनी प्रदेशका पूर्व स्वास्थ्य मन्त्री राजु खनालले बताउनुभयो । लुम्बिनी प्रदेशका १४ वटा अस्पतालको अध्ययन अनुगमन गरी समस्या समाधान तथा गुणस्तरीय सेवा प्रवाहका लागि बृहत् योजना बनाउनका लागिएको छ । अस्पताललाई आर्थिक रूपमा सबल बनाउन, खर्चलाई मितव्ययी रूपमा व्यस्थापन, गुणस्तरीय सेवा प्रदानसँगै अस्पतालको अवस्थालगायतका विभिन्न विषयमा केन्द्रीत रहेको उहाँले बताउनुभयो ।
स्वास्थ्य बिमा सबैलाई आवश्यक हो होइन भनेर पुनः अध्ययन गर्न जरुरी रहेको भन्दै पूर्वमन्त्री खनालले बिमासम्बन्धी नीति सुधारको आवश्यक रहेको बताउनुभयो । भौतिक पूर्वाधार, दक्ष जनशक्ति, आवश्यक सामग्री सहज रूपमा प्राप्त भएमा अस्पतालबाट गुणस्तरीय सेवा प्रदान गर्न सहज हुने उहाँले बताउनुभयो । अस्पतालको आय आर्जन र सेवा सुविधालाई व्यवस्थित गर्न आवश्यक रहेको उहाँको भनाइ छ ।
अस्पतालहरूको स्थलगत अनुगमनसँगै अस्पतालको अवस्था, आत्मनिर्भर बनाउन के गर्न सकिन्छ भन्ने कुराको अध्ययन गरिएको छ । अस्पतालको गुणस्तरीय सेवा प्रदान, अस्पताल व्यवस्थापन लगायतका विभिन्न विषयमा भएको छलफलमा गुल्मी अस्पतालका निमित्त मेडिकल सुपरिटेन्डेन्ट विभव बस्यालले अस्पतालको अवस्थाको बारेमा जानकारी गराउनुभयो ।
