हरिकृष्ण ऐडी
मुगु, चैत २१ गते । नेपाल नेत्रज्योति सङ्घ आँखा उपचार केन्द्र गमगढी मुगुको आयोजनामा सदरमुकाम गमगढीमा मङ्गलबार निःशुल्क आँखा शिविर सम्पन्न भएको छ । आइ कियर फाउन्डेसनको आर्थिक सहयोगमा र हिमालय आँखा अस्पताल पोखराको प्राविधिक सहयोगमा आँखा शिविर सम्पन्न भएको हो ।
नेपाल नेत्र ज्वोति सङ्घ कर्णाली प्रदेशका सभापति एवम् नेपाल नेत्र ज्वोति सङ्घका केन्द्रीय उपसभापति तिलकबहादुर मल्लका अनुसार नेपाल नेत्रज्योति सङ्घ आँखा उपचार केन्द्र गमगढी मुगुको आयोजनामा र आइ किएर फाउन्डेसनको आर्थिक सहयोगमा र हिमालय आँखा अस्पताल पोखराको प्राविधिक सहयोगमा चैत १७ देखि १९ गते सम्म निः शुल्क आँखा शिविर सञ्चालन भएको थियो ।
उक्त आँखा शिविरमा एक हजार एक सय जनाको आँखा निःशुल्क परीक्षण, औषधी र चस्मा समेत वितरण गरिएको थियो । मल्लले भन्नुभयो, "जिल्लामा सम्पन्न भएको तीन दिने आँखा उपचारबाट जिल्लाको खत्याड गाउँपालिका, सोरु गाउँ पालिका, छायाँनाथ रारा नगरपालिका, मुगुमकार्मारोङ गाउँ पालिका त्यसैगरी अन्तर जिल्ला हुम्लाबाट पनि आँखा उमचार लिनेको सङ्ख्या उल्लेख्य रहेको थियो ।"
सोरु गाउँपालिका ८ की ५८ वर्षीया काली कामीले भन्नुभयो, "आर्थिक अवस्था कमजाेर भएकोले मेरो आँखा दुई वर्षसम्म आँखा उपचार गर्नपाएको थिएन् । समयमै आँखा उपचार गर्न नपाउँदा घरपरिवारको सहाराले घरको आँगानमा हिँड्डुल गर्थे । तर अहिले निःशुल्क रूपमा आँखाको सल्यक्रिया गरेपछि घरको आँगनमा आउजाउ गर्न सहज भएको छ ।"
खत्याड गाउँपालिका ७ का जेष्ठ नागरिक कुलबहादुर रोकायाका अनुसार जिल्लामै निःशुल्क आँखा उपचार गर्न पाउँदा मेरो घरपरिवारका सदस्यलाई उपचार गर्न सहज भएको छ । यदि जिल्लाभन्दा बाहिर आँखाको उपचार गराएको भएमा ८० हजारदेखि एक लाखसम्म खर्च हुने थियो । उक्त खर्च हुनबाट आँखा शिविरले सहज गराएको अनुभव उहाँले सुनाउनुभयो ।
यता हिमालय आँखा अस्पताल पोखाराकी डाक्टर कृष्ण गुरुङका अनुसार आँखा शिविरमा सबैभन्दा बढी आँखा सम्बन्धि उपचार जेष्ठ नागरिकले लिएका छन् । जिल्लाका सम्बन्धित निकायले शिविरमा आउने सेवाग्राहीका सहजताका लागि खानेपानीको व्यावस्थापन नगरिदिँदा शिविरमा आउने सेवाग्राहीलाई सास्ती पाएको गुनासो उहाँले सुनाउनुभयो ।
