सिराज खान
नेपालगन्ज, चैत २१ गते । आफू ‘लोरेन्स बिस्नोई र अनमोल बिस्नोई हो’ भनी सामाजिक सञ्जाल व्हाट्सएप मार्फत पाँच करोड भारतीय रुपियाँ फिरौती माग गर्ने एक जनालाई इलाका प्रहरी कार्यालय कोहलपुरले नियन्त्रणमा लिएको छ ।
कोहलपुर नगरपालिका ५ मा कोठा भाडामा लिएर बस्दै आएका सुर्खेतको भेरीगङ्गा नगरपालिका वडा नम्बर ७ काठेघारी घर भएका ४१ वर्षीय रामबहादुर बुढा क्षेत्रीलाई विभिन्न विदेशी नम्बरको व्हाट्सएप मार्फत फिरौती माग गरेकोमा प्रहरीले पक्राउ गरेको इलाका प्रहरी कार्यालय कोहलपुरका प्रमुख डिएसपी धर्मराज भण्डारीले बताउनुभयो ।
उहाँले पक्राउ परेका क्षेत्रीले आफू ‘लोरेन्स बिस्नोई र अनमोल बिस्नोई हो’ भनी म्यासेज गरेर पाँच करोड भारतीय रुपियाँ माग गरेको र उक्त रकम नदिइएमा जे पनि हुन सक्ने भनी धम्काउने गरेको प्रहरीको अनुसन्धानबाट खुल्न आएको बताउनुभयो ।
साथै प्रारम्भिक अनुसन्धानको क्रममा उनले प्रयोग गर्ने मोबाइलमा विदेशी नम्बरको व्हाट्सएप खोलेको र म्यासेज गरेको समेत देखिएको डिएसपी भण्डारीले बताउनुभयो ।
प्रहरीका अनुसार चर्चित भारतीय फिरौती माग्ने र हत्या गर्ने लोरेन्स बिस्नोई र अनमोल बिस्नोईको नामबाट क्षेत्रीले फिरौती माग गर्दै आएको पाइएको छ ।
कोहलपुर इलाका प्रहरी कार्यालयका अनुसार क्षेत्रीमाथि देशका विभिन्न स्थानमा धेरै अपराध र हत्याका मुद्दा हरू दर्ता रहेको पाइएको छ । ती मध्ये ललाई फकाई विवाह गर्छु भनी एक नेपाली युवतीलाई काँकडभिट्टा हुँदै भारत तर्फ लगी गएकोमा उनीमाथि इलाका प्रहरी कार्यालय काँकडभिट्टा झापामा जिउ मास्ने बेच्ने उद्योगको मुद्दा लागेको छ ।
यस्तै, जिल्ला प्रहरी कार्यालय झापाबाट साल २०६२ चैत ८ गते धाक धम्की दिँदै सर्वसाधारणबाट चन्दा असुली गर्ने गरेकोले उनीमाथि मुद्दा लागेको छ ।
महानगरीय परिसर काठमाडौँबाट साल २०६४ भदौ ९ गते धाक धम्की दिई मानिसलाई नियन्त्रणमा लिई ट्याक्सीमा राखेर फिरौती रकम असुल गरेकोले मुद्दा पनि चलेको प्रहरीले जनाएको छ ।
यसै गरी सुर्खेत स्थित इलाका प्रहरी कार्यालय छिन्चुबाट साल २०६४ चैत २७ गते संविधान सभा निर्वाचन २०६४ का उम्मेदवार ऋषि शर्मा प्रचार प्रसार सकेर आउँदै गर्दा सुर्खेत मेहलकुना जहरेबजार नजिक लोधे भन्ने स्थानमा उनले समेत गोली हानी मारेको कर्तव्य ज्यान मुद्दा पनि क्षेत्रीलाई लागेको छ ।
सोही प्रकारले २०६५ साल चैतमा द्वन्द्वपीडित सेना प्रहरीको आन्दोलनमा हतियार खोसेको विषयमा काठमाडौँ उनीमाथि मुद्दा चलेको थियो ।
कोटेश्वरको निखिलेश्वर मन्दिरमा शक्तिबहादुर बस्नेतलाई गोली हानेको केशमा पाँच वर्ष कैद र ६० हजार जरिवाना फैसला भएकोमा उक्त कैद भुक्तान गरी साल २०७० फागुन २८ गते कारागारबाट रामबहादुर क्षेत्री छुटेका थिए ।
२०५९ सालमा नेपाल आर्मीमा भर्ना भई छोटो समय मात्र सेवा गरी त्यहाँबाट भागेपछि खासै कुनै पेसा तथा व्यवसाय नगरेका राम बहादुर बुढा क्षेत्रीले कहिले कुन समूह त कहिले कुन समूहसँग मिलेर देशको विभिन्न स्थानमा आपराधिक क्रियाकलाप गर्ने गरेको नेपाल प्रहरीको अनुसन्धानबाट खुल्न आएको कोहलपुर इलाका प्रहरी कार्यालयले जनाएको छ ।
उनले आपराधिक क्रियाकलाप गर्न भारतीय आधार कार्ड, विभिन्न विदेशका व्हाट्सएप नम्बरहरू समेत प्रयोग गर्ने गरेको पाइएकोले उनलाई नियन्त्रणमा राखेर थप अनुसन्धान भइरहेको इलाका प्रहरी कार्यालय कोहलपुरका प्रमुख डिएसपी भण्डारीले बताउनुभयो ।
