मकवानपुर समाचारदाता
मकवानपुर, चैत २१ गते । बागमती प्रदेश सभाको चालु हिउँदे अधिवेशन अन्त्य गर्ने प्रदेश सरकारको निर्णयको प्रदेश सभामा प्रतिनिधित्व गर्ने विपक्षी दलले विरोध जनाएका छन् ।
प्रदेश सरकारले चालु अधिवेशन अन्त्य गर्ने हठात् निर्णय गरेर कार्यपालिका र व्यवस्थापिकाबिचको दुरी बढाउने दिशामा सरकार उन्मुख रहेको पाइएको भन्दै अधिवेशन अन्त्य गर्ने निर्णयले सरकार प्रदेश सभाबाट भागेर गैरजिम्मेवार ढङ्गबाट प्रस्तुत भएको विपक्षी दलले आरोप लगाएका छन् ।
प्रदेश सभामा प्रतिनिधित्व गर्ने विपक्षी दल नेकपा (माओवादी केन्द्र), राष्ट्रिय प्रजातन्त्र पार्टी र नेकपा (एकीकृत समाजवादी) ले बुधबार प्रदेश सभा सचिवालय परिसरमा पत्रकार सम्मेलनको आयोजना गरी विगतमा भएका सहमति र प्रतिबद्धता सरकारले कार्यान्वयन नगरेकोप्रति आपत्ति जनाएका हुन् ।
मङ्गलबार दिउँसोका लागि बोलाइएको बैठक बस्न नसकेपछि सूचना टाँस गरेर बुधबार दिउँसो १ बजेका लागि बोलाइएको थियो । मङ्गलबार बसेको सर्वदलीय बैठकमा विपक्षी दलका बजेटसम्बन्धी माग सम्बोधन गर्ने सरकारको प्रतिबद्धतापछि बसेको कार्यव्यवस्था समितिको बैठकमा बुधबार दिउँसो १ बजे प्रदेश सभाको बैठक बस्ने सहमति भएको थियो । विपक्षी दलहरूले चालु आर्थिक वर्षको बजेट असन्तुलन भएको भन्दै प्रदेश सभाका सदस्यको माग सम्बोधन हुनुपर्नेमा जोड दिएका छन् ।
पत्रकार सम्मेलनमा नेकपा (माओवादी केन्द्र) का प्रमुख सचेतक रत्नप्रसाद ढकालले आफूहरूको विषय बजेटको मात्र नभएर सहकारीमन्त्रीको स्वकीय सचिवको आत्महत्या प्रकरण, गत असोजको दोस्रो साता आएको बाढीपहिरोपछिको राहत र पुनस्र्थापनालगायतका विषयमा रहेको बताउनुभयो ।
राष्ट्रिय प्रजातन्त्र पार्टीका प्रदेश सभा संसदीय दलका उपनेता गिरबहादुर तामाङले सरकारले प्रदेश सभालाई छलेर काम गर्ने प्रयास गरेको बताउनुभयो । नेकपा (एकीकृत समाजवादी) का प्रदेश सभा सदस्य लक्ष्मण लम्सालले मन्त्री र सत्तापक्षकै प्रदेश सभाका सदस्यबिच बजेटका विषयमा विवाद रहेकाले बुधबारको बैठक बस्न नसकेको आरोप लगाउनुभयो । उता राप्रपाका प्रदेश सभाका सदस्य कुमारी तामाङले पत्रकार सम्मेलनमा सर्वदलीय बैठकमा दलहरूबिच कुनै सहमति नभएको जिकिर गर्नुभएको छ ।
विपक्षी दलद्वारा पत्रकार सम्मेलनमा जारी विज्ञप्तिमा यस आर्थिक वर्षको बजेट पारित हुनुअघि प्रदेश सरकार र प्रदेश सभामा प्रतिनिधित्व गर्ने सबै राजनीतिक दलबिच भएको सहमति, गत असोजको अविरल वर्षापछि राहत, उद्धार र पुनर्निर्माणसँग सम्बन्धित सम्झौतासमेतलाई कार्यान्यवन गर्न सत्ता घटककै नेतृत्वमा बनेको सर्वदलीय कार्यदलले गत पुसमा मुख्यमन्त्रीसमक्ष बुझाएको प्रतिवेदन कार्यान्वयन नगरिएको उल्लेख छ ।
“प्रदेश सभामा प्रतिनिधित्व गर्ने सबै दलको साझा एजेन्डालाई गम्भीरतापूर्वक कार्यान्वयन गर्नुको सट्टा आलटाल गर्ने र अलमल्याउने नीति सरकारको देखियो,” विज्ञप्तिमा भनिएको छ, “सरकारको हठात् अधिवेशन अन्त्य गर्ने निर्णयले सरकार प्रदेश सभाबाट भागेर संसद् छलेर गैरजिम्मेवार ढङ्गबाट प्रस्तुत भएको छ ।”
माओवादी केन्द्रका रत्नप्रसाद ढकाल, राप्रपाका गिरबहादुर तामाङ र एकीकृत समाजवादीका लक्ष्मण लम्सालद्वारा संयुक्त रूपमा हस्ताक्षरित विज्ञप्तिमा भनिएको छ, “दलहरूबिच छलफल चलिरहँदा अधिवेशन अन्त्य गर्ने निर्णयले सरकारको अपरिपक्वता मात्र देखिएन, ठुला दल मिलेर बनेको सरकारको दम्भ र निरङ्कुश शैली उदाङ्गिएको छ ।”
पत्रकार सम्मेलनमा माओवादी केन्द्रका प्रमुख सचेतक ढकालले आफ्ना मागप्रति हाम्रो नेपाली पार्टीको समर्थन र नेपाल मजदुर किसान पार्टीको नैतिक समर्थन रहेकोसमेत जानकारी दिनुभयो ।
