कपिलवस्तु समाचारदाता
कपिलवस्तु, चैत २१ गते । प्रहरी कार्यालयमा निवेदन तथा उजुरी लेख्न पर्यो भने पाँच सयदेखि दुई हजार खर्च हुन्थ्यो । लेखनदास वा वकिलबाट निवेदन लेख्दा मोटो रकम तिर्नु पथ्र्यो ।
विपन्न नागरिक निवेदन दिनका लागि रकम सापटी खोज्नुपर्ने अवस्था थियो । अहिले कपिलवस्तुका हरेक प्रहरी युनिटमा यो समस्या सधैँका लागि अन्त्य भएको छ । कार्यालयमा समस्या लिएर आउने जोसुकैले पनि क्युआर कोड स्क्यान गरेर निवेदन दिन सक्ने भएका छन् ।
जिल्ला प्रहरी कार्यालय कपिलवस्तुले सेवाग्राहीलाई निवेदन लेख्नका लागि क्युआर र सहयोगी प्रहरीको व्यवस्था गरेपछि सेवाग्राही लाभान्वित भएका छन् । कार्यालयमा उजुरी दिन गएका एक व्यक्तिले निवेदन लेख्ने लेखनदास नभेटेर अलमलमा परेका थिए । प्रहरी सहायक हवलदार कमल आरसीले उहाँलाई हेर्दै मुस्कुराउँदै भन्नुभयो, “तपाईंले क्युआर कोड स्क्यान गर्न सक्नुहुन्छ भने मोबाइलबाटै फाराम डाउनलोड गर्न सक्नुहुन्छ । नभए म सहयोग गर्छु ।”
