हुम्ला समाचारदाता
हुम्ला, चैत २१ गते । कर्णाली कोरिडोरको हुम्ला अन्तर्गत याङ्चुकुनादेखि बोक्चेगौँडासम्मको सडक स्तरोन्नति सुरु भएको छ । सो खण्डको असजिलो चट्टानी भिरको काम गर्ने जिम्मा सेनाले पाएलगत्तै बुधबारदेखि स्तरोन्नति सुरु भएको हो ।
कोरिडोरको यो खण्डको असजिलो र चट्टानी क्षेत्र भएका कारण राम्रोसँग ट्र्याक खुलाउन नसक्दा यसको स्तरोन्नति गर्ने जिम्मा सेनाले पाएको हो । जिम्मेवारी पाएलगत्तै स्तरोन्नति सुरु भएको नेपाली सेना कर्णाली कोरिडोर सडक निर्माण कार्यदलका प्रमुख सेनानी अमृत पराजुलीले बताउनुभयो । जिल्ला विपत् समितिको बैठकले चैत २५ देखि सो खण्डको सडकको स्तरोन्नति सुरु गर्ने निर्णय गरे पनि सेनाले यातायात सेवा अवरुद्ध नहुने गरी सुरु गरेको उहाँले बताउनुभयो ।
दुई समूहमा कामदार परिचालन गरेर सडक खन्ने र विस्फोटका लागि प्वाल खोप्ने काम सुरु भएको छ । यो खण्डको आठ सय मिटर चट्टानी भिरमा सडकको काम सेनाले गर्ने छ । समय छोटो भएका कारण कामलाई तीव्रता दिनुपर्ने बाध्यतामा सेना रहेको उहाँले बताउनुभयो । चैत २५ बाट बोक्चेगौँडा, भिगौडामा समेत प्वाल खोप्ने काम सुरु हुने छ भने यातायात सेवा पूर्ण रूपमा बन्द हुने छ ।
यता चैत २५ बाटै सेनाले खार्पुनाथ गाउँपालिका–५ को खार्पुको दोजाम कर्णालीमा बेलिब्रिजको निर्माणको कामसमेत सुरु गर्ने छ । हाल खार्पुमा पनि बेलिब्रिज निर्माण स्थलमा खन्ने, ढुङ्गा जम्मा गर्ने कार्य सुरु भइसकेको छ । आगामी असार मसान्तसम्म सेनाको निर्माण कार्यदलले यो काम सम्पन्न गर्ने गरी जिम्मेवारी पाएको छ । गत पुसमा हुम्लावासीको मागलाई सम्बोधन गर्दै नेपाल सरकार मन्त्रीपरिषद्को बैठकले निर्णय गरेर उक्त काम सेनालाई जिम्मा लगाएको थियो ।
