.jpg)
वासुलिङ समाचारदाता
वासुलिङ (बैतडी), चैत २१ गते । विगतका वर्षमा न्यूनतम स्वास्थ्य सेवा मापदण्डमा देशभरिमै उत्कृष्ट हुने जिल्ला अस्पताल बैतडीको अङ्क यस वर्ष भने घटेको छ । गएको वर्ष ९३ अङ्क प्राप्त गरेको बैतडी अस्पतालले यस वर्ष चार अङ्क कम अर्थात् ८९ अङ्क पाएको जिल्ला अस्पताल बैतडीका सूचना अधिकारी हरिशप्रसाद पन्तले बताउनुभयो ।
जनरल फिजिसियन डाक्टर नहुँदा अस्पतालको अङ्क घटेको उहाँको दाबी छ । उहाँले भन्नुभयो, “अन्य कुरामा बरु सुधार भएको छ तर अस्पताल व्यवस्थापन समिति र फिजिसियन डाक्टर नभएका कारण यस वर्ष अङ्क घट्यो ।”
गएको पुसमा गर्नुपर्ने न्यूनतम स्वास्थ्य सेवा मापदण्डको मूल्याङ्कन चैत दोस्रो साता हुनुले पनि अङ्क घटेको पाइएको छ । अस्पतालले प्रदान गर्ने सेवा सुविधा, भौतिक व्यवस्थापनलगायतका कार्य हेरेर न्यूनतम सेवा मापदण्डको अनुगमन गरिँदै आएको छ । जिल्ला अस्पताल व्यवस्थापन समितिको म्याद २०८१ चैत २ गते सकिएको छ । राजनीतिक नियुक्तिका आधारमा बन्ने अस्पताल व्यवस्थापन समितिले तत्काल पूर्णता पाउने अनिश्चित छ ।
सीमित पूर्वाधार र उपकरणबिच अस्पतालले उत्कृष्ट सेवा दिने प्रयास गरिरहेको अस्पतालका सूचना अधिकारी पन्तले बताउनुभयो । उहाँले भन्नुभयो, “१५ शय्याको मात्रै दरबन्दी रहेको अस्पतालमा अहिले करिब ५० शøया बराबरको सेवा उपलब्ध गराइरहेका छौँ । सरकारले ५० शय्याको दरबन्दी स्वीकृत गरिदिने हो भने अस्पतालको सेवा प्रवाहको गुणस्तर अझै वृद्धि हुने थियो ।”
यस पटक सत्ता साझेदार दल नेपाली कांग्रेस र एमाले दुवैले अस्पताल व्यवस्थापन समितिको अध्यक्षका लागि दाबी गरिरहेका छन् । जिल्ला खेलकुद विकास समितिको म्यादसमेत सकिन लागेकाले दुवै सत्ता साझेदार दलमा भागबन्डा हुने सम्भावना छ ।
