गोरखापत्र समाचारदाता
काठमाडौँ, चैत २१ गते । अबदेखि भन्सार कार्यालयबाट मात्र निकासी पैठारी सङ्केत नम्बर (एक्जिम कोड) उपलब्ध गराइने भएको छ । यसअघि भन्सार विभागबाट उपलब्ध गराइँदै यस्तो नम्बर अबदेखि मातहतका भन्सार कार्यालयबाटै लिन सकिने विभागले जनाएको छ ।
विभागका अनुसार आगामी वैशाख २ देखि विभागबाट यस्तो सेवा बन्द हुने छ । नेपालबाट वस्तु निर्यात गर्ने र नेपालमा आयात गर्ने फर्म तथा संस्थाले अनिवार्य रूपमा एक्जिम कोड लिनुपर्ने कानुनी प्रावधान छ । त्यस्तो कोडका आधारमा मात्र सम्बन्धित फर्म तथा संस्थाले तोकिएको वस्तु तथा सेवा आयात वा निर्यात गर्न सक्छन् ।
विभागले अबदेखि यस्तो व्यवस्था देशभरका विभिन्न भन्सार कार्यालयबाट लिन पाउने हुँदा सेवाग्राहीलाई सहज हुने उल्लेख गरेको छ । निजी क्षेत्रले पनि भन्सार कार्यालयबाट पनि एक्जिम कोड लिन सक्ने व्यवस्था गरिदिन लामो समयदेखि माग गर्दै आएका थिए ।
