धरान (सुनसरी), चैत २० गते । कोशी प्रदेश प्रिमियर लिगको आयव्यय सार्वजनिक गरिएको छ । धरानको एन्फा एकेडेमीमा आज आयोजित पत्रकार सम्मेलनमा प्रदेश फुटबल सङ्घका कोषाध्यक्ष आनन्द चौधरीले लिगको आयव्यय सार्वजनिक गर्नुभएको हो ।
सार्वजनिक गरिएको आयव्यय अनुसार कोशी प्रदेश प्रिमियर लिगबाट ६ लाख ९० हजार नाफा भएको छ । कोषाध्यक्ष चौधरीका अनुसार लिग सञ्चालन गर्दा ३६ लाख ६७ हजार सहयोग जुटेको थियो भने २९ लाख आठ हजार खर्च भएको थियो । लिग सञ्चालन गर्न कोशी प्रदेश सरकारको २० लाख तथा अखिल नेपाल फुटबल सङ्घ (एन्फा)को १५ लाख खर्च भएको थियो ।
यसैगरी गोर्खा ब्रुअरीबाट ५० हजार, रेडबुलबाट ५० हजार, धरानका पूर्व खेलाडीहरुबाट ३७ हजार तथा अन्य दाताबाट ३० हजार जुटेको थियो । नगद पुरस्कारमा सात लाख ६५ हजार, पहाडी जिल्लाका क्लबलाई तयारी खर्चवापत चार लाख २० हजार, तराईका जिल्लालाई विशेष तयारीवापत दुई लाख तथा रेफ्रिलगायतमा तीन लाख ५० हजार खर्च भएको कोशी प्रदेश फुटबल सङ्घका अध्यक्ष किशोर राईले बताउनुभयो । कोशी प्रदेश प्रिमियर लिग गत माघ २८ गतेदेखि फागुन ८ गतेसम्म धरान उपमहानगरपालिका-१६ स्थित रङ्गशालामा सञ्चालन भएको थियो । लिगमा कोशी प्रदेशका ११ क्लबको सहभागिता रहेको थियो । रासस
