रामकृष्ण बोहरा
बागलुङ, चैत २० गते । मिर्गी रोगबाट पीडित बागलुङकी एक चार वर्षीया बालिकाको उपचारका लागि सहयोग अभियान थालेको २० दिनमै ६८ लाख रुपियाँ सङ्कलन भएको छ।
बागलुङ नगरपालिका ७ की चार वर्षीया शुभेच्छा खत्रीको उपचारका लागि अभिभावकले थालेको सहयोग सङ्कलन अभियानमा ६८ लाख ८६ हजार २ सय १२ रुपियाँ सङ्कलन भएको अभियानका संयोजक नेत्रलाल न्यौपानेले जानकारी दिनुभयो ।
सञ्चारमाध्यममा समाचार आएपछि देशविदेशबाट सहयोग आएको भन्दै शुवेक्षाका बुबा सागर खत्रीले पत्रकार र सहयोगीलाई धन्यवाद ज्ञापन गर्नुभयो । उपचारका लागि ५० लाख रुपियाँ खर्चको अनुमान गरिएकोमा बढी रकम संकलन भएको खत्रीले बताउनुभयो ।
सागर खत्री र मनिषा गैरेकी छोरी शुभेच्छालाई मिर्गी रोग लागेपछि हाल भारतको सर गंगाराम अस्पतालमा उपचार भइरहेको छ । उहाँको उपचारमा परिवारले ५० लाख रुपियाँ खर्च गरिसकेपछि आर्थिक अभाव भएकोले अभियान थालिएको थियो । हाल बिरामीकी आमा अस्पतालमा हुनुहुन्छ भने बाबुले नेपालमा सहयोग अभियान चलाउनुभएको थियो ।
५० लाख सङ्कलन गर्ने लक्ष्यले थालिएको अभियानको २० दिनमै ६८ लाख रुपियाँ सङ्कलन भएपछि तत्कालको खर्च टर्ने भन्दै परिवारका सदस्य र सहयोग समितिका सदस्यले आर्थिक सहयोग सङ्कलन कार्यक्रम स्थगित गरेको जनाएका छन् ।
समितिका संयोजक नेत्रलाल न्यौपानेले तत्कालको खर्च जोहो भएको उल्लेख गर्दै सङ्कलन भएको रकम खर्च नभई बाँकी रहेमा सामाजिक काममा लगाउने बताउनुभयो । अभियानमा लायन्स, रोटरी लगायतका क्लब, निजी तथा सामुदायिक बिद्यालय, युवा क्लब, अस्पताल र क्याम्पस, छिमेकी र आफन्तले साथ दिनुभएको थियो ।
