ठाकुरप्रसाद आचार्य
म्याग्दी, चैत २० गते । म्याग्दीको सडक योजनामा काम गर्ने मजदुरहरुले काम गरेको ज्याला नपाएको भन्दै ठेकेदारको गाडी र डोजर बेनीमा रोकेका छन् ।
बेनी–दरबाङ सडकअन्तर्गत निर्माणधिन रणबाङ–दरबाङ खण्डको सडक स्तरोन्नति योजनामा काम गरेका मजदुरहरुले ज्याला नपाएको भन्दै गाडी र डोजर बेनीमा रोकेका हुन् । मजदुरहरुले प्रदेश २–०३ को ००१ क ०१३४ नम्बरको गाडीमा लोड गरेको डोजरसहित गाडी रोकेका छन् ।
सडक स्तरोन्नति योजनाको ठेकेदार कम्पनी क्याराभान कन्स्ट्रक्सनले विगत दुई वर्ष अघि देखि काम गरेका २५ जनाको करिब ३० लाख रुपियाँ पारिश्रमिक नदिएको रुकुम चौरजहारी नगरपालिका ८ का मजदुर तुलराम सार्कीले बताउनुभयो । काम गरेको ज्याला नपाएपछि मजदुरहरुलाई विहान बेलुको छाक टार्न पनि धौँधौँ भएको उहाँले बताउनुभयो ।
उहाँले भन्नुभयो, ‘‘२०७८ सालमा काम गरेको ज्याला हामीले पाएका छैनौं । पटक पटक ज्याला माग गर्दा उहाँले हाम्रो कुरा सुन्नुभएन । त्यसैले न्यायाका लागि ठेकेदारको गाडी र डोजर रोकेका हौं । ज्याला नपाएसम्म हामीले छाड्दैनौं । सम्बन्धित निकायले मजदुरलाई न्याया दिलाइदिनु प¥यो ।’’
ज्याला भुक्तानी नगरेसम्म कार्यस्थलबाट उपकरण लैजान रोकेपनि सोमबार राति उपकरण लोड गरेर हिँडेपछि हामीले प्रहरीलाई खबर गरेर बेनीमा गाडी रोक्न लगाएको मजदुर सार्कीले बताउनुभयो । मङ्गलबार रातभर मजदुरले गाडी कुरेर बसेको उहाँको भनाइ थियो ।
जिल्ला प्रशासन कार्यालय म्याग्दीमा यसअघि पटक पटक छलफल भए पनि ठेकेदारले रकम भुक्तानी गर्न अटेर गरेको उहाँको गुनासो छ । ‘‘हामीले ज्याला नपाएसम्म कार्यस्थलबाट उपकरणहरु नलैजान ठेकेदारलाई दबाब दिएका थियौं’’ मजदुर सार्कीले भन्नुभयो, ‘‘रातरात उपकरण लोड गरेर लैजान थालेपछि हामीले प्रहरीलाई खबर गरेर बेनीमा रोकेका छौं । ज्याला नपाए सम्म लैजान दिन्नौं ।’’
मजदुरहरुले बेनी नगरपालिका गेट अगाडि दुईदिन देखि उक्त डोजर र गाडी रोकेका छन् । मजदुरहरुले राति पनि गाडीलाई कुरेर बसेका छन् । जिल्ला प्रहरी र जिल्ला प्रशासन समक्ष ज्याला दिलाइदिन अनुरोध गरेपनि सहयोग नपाएको मजदुरहरुको गुनासो छ ।
क्याराभान कन्स्ट्रक्सनसँग सम्झौता गरी २०७९ मङ्सिर १५ गतेदेखि २०७९ चैत मसान्तसम्म काम गरेका मजदुरहरुको रकम कन्स्ट्रक्सनका प्रवन्ध निर्देशक चन्द्रप्रकाश थकालीले उपलब्ध नगराएको र रकम माग्दा उल्टै धम्की दिएको क्युपेक नेपालका केन्द्रीय सचिव बलादेवी राईले बताउनुभयो । ठेकेदार कम्पनीले मजदुरहरुलाई ज्याला भुक्तानी नगरेसम्म गाडी र डोजर नछाडिने र आन्दोलनमा उत्रिने उहाँले बताउनुभयो ।
