राष्ट्रिय गान गाएर नागरिकको सेवा

बोमलाल गिरी
नवलपुर, चैत २० गते । नवलपुरको देवचुली नगरपालिकाले सेवा प्रवाहलाई अनुशासित, जिम्मेवार र राष्ट्रप्रति सम्मान जनाउन नयाँ अभ्यास सुरु गरेको छ । नगरपालिकाले मङ्गलबारदेखि हरेक दिन बिहान १० बजे राष्ट्रिय गान गाएर मात्र सेवा सुरु गर्ने परम्पराको थालनी गरेको हो ।

नगरपालिकाका प्रमुख हरिप्रसाद न्यौपानेका अनुसार यो अभ्यासले कर्मचारीहरूमा राष्ट्रप्रति समर्पण, अनुशासन र एकताको भावना जागृत गराउने छ । उहाँले भन्नुभयो, “राष्ट्रिय गान हाम्रो गौरव हो । यसलाई गाएर काम सुरु गर्दा देशभक्ति झन् सशक्त हुन्छ ।”

नगरपालिकाले सुरु गरेको यो अभियानले कार्यालय समयको व्यवस्थापन सुधार गर्ने, कर्मचारीहरूलाई समयमा उपस्थित गराउने र राष्ट्रप्रेम जागृत गर्ने लक्ष्य लिएको छ । नगरप्रमुख न्यौपानेका अनुसार यस अभ्यासले कर्मचारीहरूलाई सकारात्मक ऊर्जा प्रदान गर्नुका साथै सेवाग्राहीलाई पनि राम्रो अनुभूति दिलाउने विश्वास गरिएको छ ।

“सरकारी कार्यालयहरूमा समयमा काम नहुने गुनासो आम नागरिकमा रहँदै आएको छ । हामीले यो नयाँ अभ्यास थालेर सकारात्मक सन्देश दिएका छौं,” न्यौपानेले भन्नुभयो । नगरपालिकाका कर्मचारीहरू दैनिक बिहान १० बजे एक ठाउँमा भेला भएर राष्ट्रगान गाउने र त्यसपछि मात्र औपचारिक रूपमा नागरिककामा लाग्ने छन् ।

नगरपालिकाले अपनाएको यो नयाँ अभ्यास अन्य स्थानीय तहहरूका लागि पनि प्रेरणादायी बन्न सक्ने अपेक्षा गरिएको छ । नगर प्रमुख न्यौपाने भन्नुभयो, “हामीले चालेको यो सानो कदमको प्रभाव दीर्घकालीन हुनेछ ।” देवचुली नगरपालिकाको यो अभ्यास राष्ट्रप्रेम, अनुशासन र प्रभावकारी सेवा प्रवाहको उदाहरणीय प्रयासका रूपमा गरिएको कर्मचारीहरूले बताएका छन् ।