बागमती प्रदेशको हिउँदे अधिवेशन अन्त्य गर्न सिफारिस

राममणि दाहाल
मकवानपुर, चैत २० गते । बागमती प्रदेश सरकारले बागमती प्रदेशसभाको हिउँदे अधिवेशन बुधबार रातिबाट अन्त्य गर्ने निर्णय गरेको छ ।

प्रदेश सरकारको मुख्यमन्त्री कार्यालय, हेटौँडामा बुधबार बसेको मन्त्रिपरिषद् बैठकले चालु अधिवेशन अन्त्य गर्न बागमती प्रदेशका प्रदेश प्रमुखलाई सिफारिस गर्ने निर्णय गरेको हो ।

प्रदेश सरकारका प्रवक्ता एवम् आन्तरिक मामिला तथा कानुनमन्त्री सुरजचन्द्र लामिछानेले मन्त्रिपरिषद् बैठकले प्रदेशसभाको चालु अधिवेशन बुधबार राति १२ बजेबाट अन्त्य गर्न प्रदेश प्रमुखलाई सिफारिश गर्ने निर्णय गरेको जानकारी दिनुभयो ।

प्रदेशसभाको अधिवेशन प्रदेश सरकारको मन्त्रिपरिषद् बैठकको सिफारिशमा प्रदेश प्रमुखबाट आह्वान र अन्त्य गर्ने संवैधानिक व्यवस्था रहेको छ । 

प्रदेश सरकारले अर्को अधिवेशन छिट्टै आह्वान गरी प्रि बजेटसम्बन्धी छलफल सुरु गर्ने तयारी गरेको मन्त्री लामिछानेको भनाइ छ । गत माघ १८ गतेबाट प्रदेशसभाको चालु अधिवेशन सुरुभएको थियो ।