• २१ चैत २०८१, बिहिबार

तीन क्वीन्टन गाँजासहित धनकुटाबाट एकजना पक्राउ

blog

कार र गाजासहित पक्राउ परेका व्यक्ति । तस्बिर : कोकिला भण्डारी

कोकिला भण्डारी
धनकुटा, चैत २० गते ।
धनकुटाको साँगुरीगढी गाउँपालिका ६, कामफेक छेउमा तीन क्वीन्टन गाँजासहित रातो कारमा सवार एकजना प्रहरीले पक्राउ गरेको छ ।

इलाका प्रहरी कार्यालय भेडेटारले मङ्गलबार राति चेकजाँच गर्ने क्रममा को १ च ३४७८ नम्बरको कारभित्र कालो प्लाष्टिकले १० पोकामा बेरेर राखिएको तीन क्वीन्टन गाँजा बरामद गरिएको जिल्ला प्रहरी कार्यालय धनकुटाका डिएसपी तथा प्रवक्ता ओमप्रकाश खनालले जानकारी दिनुभयो ।

इलाका प्रहरी कार्यालयबाट खटिएको टोलीले भेडेटार रवि–राँके सडकखण्डमा प्रहरी नायव निरीक्षक रमेश प्रधानको टोलीले चेकिङको क्रममा कारभित्र कालो प्लास्टिकले बेरेर पोका पारेको १० पोका गाँजा बरामद गरेको जनाइएको छ ।

सो कारभित्र रहेको गाँजा ३० केजीको दरले पोको पारिएको दस वटा पोकामा लुकाएर राखिएको अवस्थामा गाँजा फेला परेको प्रहरीले जनाएको छ । गाँजासहित कारमा सवार मोरङको विराटनगर महाननगरपालिका १५ का २६ वर्षीय प्रिन्सकुमार साहलाई नियन्त्रणमा लिइएको छ । कार चालक फरार रहेकाले खोजतलास भइरहेको प्रहरीको भनाइ छ ।