नियन्त्रणमा लिइएको बाघ छाडियो जङ्गलमा

धनगढी समाचारदाता

धनगढी, चैत २० गते । मानव बस्तीबाट नियन्त्रणमा लिइएको पाटेबाघ जङ्गलमा छाडिएको छ । कञ्चनपुरको बेलौरी नगरपालिका–२, टेँढुवागाउँबाट नियन्त्रणमा लिइएको वयस्क भाले पाटेबाघलाई सोमबार राति वनमा छाडिएको हो ।

सबै प्रक्रिया पूरा गरेर बाघलाई शुक्लाफाँटा राष्ट्रिय निकुञ्जको कोर एरियामा छाडिएको डिभिजन वन कार्यालय कञ्चनपुरका प्रमुख रामविचारी ठाकुरले बताउनुभयो । गत शुक्रबार राति टेँढुवागाउँ पसेको बाघलाई आइतबार दिउँसोतिर मात्रै नियन्त्रणमा लिइएको थियो । बाघले गाउँमा एक बाच्छालाई मारेको थियो । 

बेलैमा सतर्कता अपनाइएका कारण मान्छेलाई भने कुनै नोक्सानी भएन । चारैतिर बस्ती भएको ठाउँमा पुगेको बाघ एक दिनभरि गहुँबारीमा बसेको थियो । सन् २०२२ को तथ्याङ्क अनुसार शुक्लाफाँटामा ३६ वटा पाटेबाघ छन् । डिभिजन वन क्षेत्र अन्तर्गतका स्थानबाट उद्धार गरिएका बाघलाई डिभिजन वन कार्यालय र निकुञ्ज तथा मध्यवर्ती क्षेत्रबाट उद्धार गरिएका बाघलाई निकुञ्जले व्यवस्थापन गर्ने गर्छन् । 

सुदूरपश्चिम प्रदेशमा उद्धार केन्द्र नहुँदा बाघ व्यवस्थापन गर्न समस्या छ । प्रदेश सरकारले वन्यजन्तु उद्धार केन्द्र बनाउन आवश्यक रहेको प्रमुख ठाकुरको भनाइ छ । 

“सुदूरपश्चिम प्रदेशमै उद्धार केन्द्र नहुँदा समस्या छ,” उहाँले भन्नुभयो, “प्रदेश सरकारले उद्धार केन्द्र बनाउनु पर्छ ।” दुई वर्षअगाडि बेलौरीकै खप्टीखोलामा बाघले एक महिलालाई मारेको थियो । नियन्त्रणमा लिइएको त्यो नरभक्षी बाघलाई सदर चिडियाखानामा राखिएको छ ।