मिरुनाको डायरीमा अटो भर्दै विपिन

गोरखापत्र समाचारदाता

काठमाडौँ, चैत २० गते । एक समय थियो, जब डायरीका पानामा साथीभाइ, आफन्तजन र प्रियजनका माया मिसिएका शब्द कोरिन्थे, तिनै पानामा फोटो टाँसिन्थे, अनि जीवनका अविस्मरणीय क्षण अक्षरमा कैद गरिन्थ्यो । प्रेमीप्रेमिकाले सँगै बिताएका पल, साझा सपना र गहिरा भावना डायरीका हरफमा जिउँदै थिए तर डिजिटल युगको उदयसँगै त्यो परम्परा धमिलो बन्दै गयो, स्मृति अब स्क्रिनमा कैद हुन्छन् तर तिनको आत्मीय कत्तिको बाँकी छ भन्ने प्रश्न उठ्न थाल्यो ।

यही भुलिँदै गएको समयलाई मङ्गलबार प्रदर्शन गरिएको चलचित्र ‘उनको स्वेटर’ को टिजरले पुनः जीवित गरिदिएको छ, जहाँ डायरीका पाना पल्टाउँदा निस्किने पुरानो यादको सुवास अझै पनि ताजा महसुस गर्न सकिन्छ । चलचित्रको टिजरमा प्रेम, भावनात्मक द्वन्द्व र स्मृतिको यात्रा प्रस्तुत गरिएको छ । चलचित्रमा विपिन कार्की र मिरुना मगर मुख्य भूमिकामा देखिनुभएको छ । साथै विल्सनविक्रम राई, एलेक्स पारस र परीक्षा लिम्बूको पनि अभिनय रहेको छ । यिनै पाँच कलाकारको वरिपरि घुम्दै टिजरले प्रेम, स्मृति र सम्बन्धका उतारचढावलाई सौन्दर्यपूर्ण ढङ्गले प्रस्तुत गर्ने प्रयास गरेको छ । टिजरमा मिरुनाले दिएको डायरीमा विपिन आफ्ना भावना लेख्दै गरेको दृश्य प्रस्तुत गरिएको छ ।