गोरखापत्र समाचारदाता
काठमाडौँ, चैत २० गते । अभिनेता राजेश हमालले कलाकारको उमेर कति पुग्यो र उहाँसँग जोडी बाँध्ने कलाकारको उमेर कति अन्तरको छ भन्ने विषयमा चर्चा गर्नुभन्दा पनि कलाकारलाई त्यो पात्रमा कतिको सुहाएको छ भन्ने चर्चा हुनु आवश्यक रहेको बताउनुभएको छ ।
चलचित्र ‘नरसिंहा अवतार’ चलचित्रको पोस्टर सार्वजनिक तथा प्रदर्शन मिति घोषणा कार्यक्रममा अभिनेता हमालले एउटा कलाकारले अभिनय गर्न सक्षम छ भने उसलाई उमेरले असर नगर्ने बताउनुभयो ।
उहाँले भन्नुभयो, “मेरो उमेर कति पुग्यो वा मसँग अभिनय गर्ने, जोडी बन्ने कलाकारसँग कति उमेर अन्तर छ भन्ने विषयमा चर्चा गर्नुभन्दा हामी त्यो पात्रमा कस्तो देखिएका छौँ भन्ने विषयको चर्चा हुनु पर्छ ।” उहाँले थप्नुभयो, “पर्दामा कलाकारको उमेर नभई अभिनय हेरिन्छ र हामीकहाँ एउटा कलाकारले यति उमेरसम्म मात्र अभिनय गर्न पाउने भन्ने पनि छैन । यहाँ केही कलाकारले
लामो समयसम्म आफूलाई अभिनयमा सक्रिय बनाएका छन्, म त्यहीमध्येको एक हुँ ।” उहाँले चलचित्रको विषय र आफ्नो पात्र सुहाउँदो भूमिका रहेकाले आठ वर्षपछि चलचित्रमा अभिनय गरेको स्पष्ट पार्नुभयो ।
अभिनेता हमालको जोडी बनेर चलचित्रमा अभिनय गर्न पाउँदा चलचित्रकी नायिका नीति शाहले आफ्नो अभिनय यात्राले नयाँ उचाइ पाउने विश्वास व्यक्त गर्नुभयो । दिवाकर भट्टराई निर्देशित चलचित्र आउँदो वर्ष जेठ ९ मा प्रदर्शन हुने छ । चलचित्रमा सरोज खनाल, नीर शाह, राज कटुवाल, सनिसा भट्टराई, उषा खड्गी, अर्जुन श्रेष्ठ, प्रशान्त ताम्राकारलगायतका कलाकारको पनि अभिनय रहेको छ ।
