गोरखापत्र समाचारदाता
काठमाडौँ, चैत २० गते । नेपाल स्टक एक्सचेन्ज (नेप्से) का प्रमुख कार्यकारी अधिकृत (सिइओ) मा चूडामणि चापागाईं नियुक्त हुनुभएको छ । सोमबारको मन्त्रीपरिषद् बैठकले चापागाईंलाई नेप्से सिइओमा नियुक्त
गरेको हो ।
नेप्सेका नवनियुक्त प्रमुख कार्यकारी अधिकृत चापागाईंले मङ्गलबार नियुक्तिपत्र बुझ्नुभएको छ । राजस्व सचिव दिनेशकुमार घिमिरेले उहाँलाई नियुक्तिपत्र प्रदान गर्नुभएको हो ।
लामो समय सानिमा बैङ्कमा आबद्ध रहेर काम गरे चापागाईं हाल सानिमा रिलायन्स लाइफ इन्स्योरेन्सका डेपुटी जनरल म्यानेजर रहनुभएको थियो । त्यसअघि उहाँ पाथीभरा विकास बैङ्क, सनराइज बैङ्क, युनियन लाइफ र सानिमा लाइफ हुँदै सानिमा रिलायन्स लाइफमा आबद्ध हुनुभएको थियो । यसअघि नियुक्त नेप्से सिइओ नारदकुमार लुइटेल विवादमा तानिएपछि सरकारले नयाँ प्रमुख कार्यकारी नियुक्त गरेको हो ।
यसअघिको मन्त्रीपरिषद्को बैठकमा अर्का प्रतिस्पर्धी नारदकुमार लुइटेललाई बनाउने निर्णय भए पनि ‘माइन्युट’ हुनुअघि प्राप्त सूचनाका आधारमा सरकारले निर्णय उल्ट्याएको हो ।
सिइओ छनोटका लागि अन्तिम पाँच जना उम्मेदवारको सूचीमा चूडामणि चापागाईं, नारदकुमार लुइटेल, पूर्णप्रसाद आचार्य, बद्रीप्रसाद प्याकुरेल र हेमन्त बस्यालको नाम परेको थियो । तत्कालीन सिइओ कृष्णबहादुर कार्कीको पदावधि सकिएपछि गत माघ २५ देखि नेप्से सिइओविहीन रहेको थियो ।
