बुटवल समाचारदाता
बुटवल, चैत २० गते । लुम्बिनी प्रदेशका उद्योग, पर्यटन तथा यातायातमन्त्री प्रचण्डविक्रम न्यौपानेले प्रदेशमा स्थापना भएका साना तथा मझौला उद्योगलाई प्रदेश सरकारले संरक्षण गर्ने प्रतिबद्धता जनाउनुभएको छ । मन्त्री न्यौपानेले घरेलु तथा साना उद्योगले समेत रोजगारीको अवसर सिर्जना गर्दै आएको र देशको आर्थिक विकासमा योगदान दिएकाले त्यस्ता उद्योगलाई प्रदेश सरकारले संरक्षण गर्ने बताउनु भएको हो ।
नेपाल घरेलु तथा साना उद्योग महासङ्घ लुम्बिनी प्रदेशको तेस्रो अधिवेशन तथा महिला उद्यमी सम्मेलनको मङ्गलबार बुटवलमा उद्घाटन गर्दै मन्त्री न्यौपानेले रोजगारमुखी र निर्यातमुखी उद्योगलाई प्रदेश सरकारले सहयोग गर्ने नीति लिएको बताउनुभयो ।
उहाँले घरेलु तथा साना उद्योगबाट पनि देशमै स्वरोजगार बन्न सकिने सम्भावना रहेको र धेरैलाई रोजगारी दिन सकिने भएकाले प्रदेश सरकारले त्यस्ता उद्योगको प्रवर्धन गर्ने योजना अगाडि सारेको पनि बताउनुभयो ।
मन्त्री न्यौपानेले निजी क्षेत्रबाट सञ्चालन भएका तर बन्द भएका उद्योग पुनः सञ्चालन गर्न मन्त्रालयले सहयोग गर्ने बताउँदै त्यस्ता उद्योगबारे जानकारी दिन र पुनः सञ्चालनको योजना पेस गर्न उद्योगी व्यवसायीसँग आग्रह गर्नुभयो । महासङ्घका लुम्बिनी प्रदेश अध्यक्ष नेत्रप्रसाद पाठकले लघु, घरेलु तथा साना उद्योगीलाई राज्यले संरक्षण गर्न माग गर्नुभयो । उहाँले सरकारले उद्योगमैत्री नीति नबनाउँदा उद्योगीहरू पलायन हुँदै गएको भन्दै चिन्ता प्रकट गर्नुभयो ।
औद्योगिक विकासका लागि औद्योगिक सूचना केन्द्र स्थापना गर्नुपर्ने माग गरे पनि अझैसम्म बन्न नसकेको भन्दै अध्यक्ष पाठकले उद्योगमा विद्युत् जडान, उद्योग दर्तामा एकद्वार प्रणाली लागु गर्नुपर्ने र औद्योगिक सुरक्षा जस्तो विषयमा राज्य गम्भीर हुनुपर्ने बताउनुभयो । लुम्बिनीका प्रदेशका १२ जिल्लाका २४३ प्रतिनिधिको सहभागिता रहेको अधिवेशनले नयाँ नेतृत्वसमेत चयन गर्ने छ ।
