गोरखापत्र समाचारदाता
काठमाडौँ, चैत २० गते । वैदेशिक रोजगारीका क्रममा संयुक्त अरब इमिरेटस् (युएई) मा गएर विभिन्न कसुरमा जेल सजाय भोगिरहेका १६६ नेपाली श्रमिकले आममाफी पाएका छन् । मुस्लिमको पर्व रमजान एवं इदको अवसर पारेर युएई सरकारले विभिन्न कसुरमा बन्दी भएका १६६ नेपाली आप्रवासी श्रमिकलाई अवसर दिएको हो । युएइस्थित नेपाली दूतावासका युएईमा विभिन्न कसुरमा बर्सौंदेखि जेल सजाय भोग्दै आएका १६६ जना नेपाली श्रमिकलाई युएई सरकारले आममाफी दिएको जानकारी दिएको जनाएको छ । नेपाली बन्दीलाई आममाफी दिएकोमा युएई सरकारप्रति नेपाली दूतावासले विज्ञप्तिमार्फत धन्यवाद व्यक्त गरेको छ । श्रम, रोजगार तथा सामाजिक सुरक्षा मन्त्रालयले विज्ञप्ति जारी गर्दै युएई सरकारको उक्त कदमको प्रशंसा गर्दै द्विपक्षीय सम्बन्धको नमुना भएको जनाएको छ । यसअघि कतार सरकारले पनि १८ जना नेपाली श्रमिकलाई आममाफी दिएको थियो ।
