गोरखापत्र समाचारदाता
काठमाडौँ, चैत २० गते । सिमेन्टको मूल्य प्रतिबोरा २५ रुपियाँसम्म घटेको छ । वाणिज्य, आपूर्ति तथा उपभोक्ता संरक्षण विभागले सिमेन्टको मूल्य बढ्नुको कारणसहितको विवरण पेस गर्न निर्देशन दिएको एक साताभित्रै सिमेन्ट उद्योगीले मूल्य घटाएका हुन् । सिमेन्ट उद्योगमा यसअघि हुँदै आएको लोडसेडिङ घटेसँगै उद्योगीले सिमेन्टको मूल्य घटाउन थालेका हुन् । यता सिमेन्ट उद्योगीले भने उद्योगमा लोडसेडिङ घटेर उत्पादन बढेसँगै सिमेन्टको मूल्य घटेको जानकारी दिएका छन् ।
विभागका महानिर्देशक कुमारप्रसाद दाहालले लोडसेडिङ पूर्ण रूपमा हटेपछि सिमेन्टको मूल्य अझै घट्ने जानकारी दिनुभयो । विभागका महानिर्देशक दाहालले अघिल्लो साता सिमेन्ट र फलामे डन्डी उद्योगीलाई विभागमा बोलाएर एक साताभित्र अधिकतम खुद्रा मूल्य एमआरपी, गुणस्तरसहितको लेबल हालेर मात्रै बजारमा पठाउन निर्देशन दिनुभएको थियो । उद्योगीले एक साताको समय माग गरेका थिए । एमआरपीबिनाका सिमेन्ट र डन्डी विभागले अनुगमनका क्रममा भेटेमा जफत गरी उद्योगीलाई कारबाही गर्ने पनि उहाँले जानकारी दिनुभयो ।
