साहारा लिम्बू
फुङलिङ, चैत १६ गते । ताप्लेजुङको सुकेटार विमान स्थलमा साढे तीन महिनापछि आएको जहाज अवतरण हुन सकेन । मौसम प्रतिकुलताका कारण ट्विनअटर जहाज अवतरण हुन नसकेपछि पुन काठमाडौँ फर्किएको छ ।
नेपाल वायु सेवा निगमको दुई वटा जहाज ग्राउन्डेड भएपछि साढे तीन महिनादेखि सुकेटार विमान स्थलमा हवाई उडान ठप्प भएको थियो । एउटा जहाजको मर्मत सम्पन्न भएपछि आजदेखि काठमाडौँ–ताप्लेजुङ–काठमाडौँ उडान तालिका तय भएको थियो ।
जसअन्तर्गत काठमाडौँबाट १० जना यात्रु लिएर आएको जहाज अवतरण हुन नसकेपछि आकाशमै केही समय होल्ड भएको थियो । होल्ड गरेपनि मौसममा सुधार हुने सम्भावना न्युन देखिएपछि जहाज पुन काठमाडौँ फकिएको नेपाल वायु सेवा निगम ताप्लेजुङ स्टेसनका कर्मचारी कुमार गुरुङले बताउनुभयो ।
गुरुङका अनुसार ताप्लेजुङबाट काठमाडौँ जान टिकट लिएका चार जना यात्रु घण्टौसम्मको पर्खाइपछि पुन घर फर्कन बाध्य भएका छन् । पाथीभरा याङवरक गाउँपालिका ३ तिरिङगेका ६० वर्षीया कमलादेवी विष्ट नसासम्बन्धी उपचारका लागि काठमाडौँ जाने तयारीमा हुनुहुन्थ्यो । तर जहाज अवतरण हुन नसकेपछि उहाँ गाडीकै माध्यमबाट जान बाध्य हुनु भएको छ ।
समयमै उपचारका लागि पुग्नु पर्ने बाध्यता भएकाले गाडीको टिकट समेत लिइसके उहाँले बताउनुभयो । गाडीमा लामो बाटोको यात्रा गर्दा वृद्धवृद्धालाई सकस पर्ने भए पनि बाध्यताले जानुपरेको उहाँ सुनाउनुहुन्छ । जहाजको पर्खाइमा बसेका उहाँसँगै हिदिङबा दाहाल, पार्वती खत्री र पुर्ण गुरुङ जहाज अवतरण नभएपछि निराश हुँदै विमानस्थलबाट फर्कनु भएको छ ।
आगामी उडान शनिबारका लागि मात्रै तय भएको छ । तत्कालका लागि हाल सातामा एक दिन शनिबार मात्रै उडान तय भएको छ । वैशाखपछि साताको अन्य दिन समेत उडान तालिका थप गर्ने योजनामा रहेको निगमले जनाएको छ ।
