सुर्खेत समाचारदाता
सुर्खेत, फागुन २२ गते । अर्गानिक प्रदेशको आधार तय भएको कर्णालीमा रासायनिक विषादीको प्रयोग बढ्दै गएकोमा सरोकारवालाले चिन्ता व्यक्त गरेका छन् । उनीहरूले बढी उत्पादनको लोभमा बढ्दै गएको रासायनिक विषादीको प्रयोगलाई न्यूनीकरण गर्नुपर्ने भन्दै जैविक विषादीतर्फ उन्मुख हुनुपर्नेमा पनि जोड दिएका छन् ।
एकीकृत कृषि प्रयोगशाला सुर्खेतले आयोजना गरेको रासायनिक विषादी न्यूनीकरणसम्बन्धी सचेतना कार्यक्रममा कृषि उत्पादनमा रासायनिक विषादीको प्रयोगलाई न्यूनीकरण गर्नुपर्ने र त्यसका लागि सबै पक्षहरू सचेत हुनुपर्ने जनाइएको छ ।
कर्णाली प्रदेशको भूमि व्यवस्था कृषि तथा सहकारी मन्त्रालयका सचिव परशुराम रावतले बढी कृषि उत्पादन गर्ने लोभमा रासायनिक विषादीको प्रयोग बढ्दै गएको पाइएको बताउनुभयो । उहाँले कर्णाली प्रदेश सरकारले प्राङ्गारिक प्रदेशको आधार तय गर्न सात वर्षअगाडि निर्णय गरिसकेको तर रासायनिक विषादीको प्रयोग बढ्दै गइरहेको पाइएकाले अब त्यसको प्रयोग घटाउनुपर्ने जनाउनुभयो ।
किसानलाई रासायनिक विषादीको सट्टा जैविक विषादीमा सहयोग गर्नुपर्नेमा जोड दिँदै साबिकको कर्णाली अञ्चलका जुम्ला, हुम्ला, मुगु, डोल्पा र कालीकोटमा रासायनिक विषादीको प्रयोगमा रोक लगाइएको बताउनुभयो । उहाँले ती जिल्लामा रासायनिक विषादीमा रोक लगाउँदै बिक्रीको अनुमति नदिइएको र प्राङ्गारिक कृषिमै उत्पादन गर्न सहयोग गरिएको जनाउनुभयो । साथै कर्णाली प्रदेशका सुर्खेतसहित, दैलेख, सल्यान, जाजरकोट र रुकुमपश्चिममा पनि रासायनिक विषादीलाई न्यूनीकरणका लागि विभिन्न विकल्प खोजिएको सचिव रावतको भनाइ छ ।
उहाँले कर्णाली प्रदेशमा भित्रिने तरकारीको विषादी परीक्षणका लागि सुर्खेतको बबई र सल्यानको कपुरकोट नाकामा विषादी परीक्षण प्रयोगशालालाई छिट्टै सञ्चालनमा ल्याइने जानकारीसमेत दिनुभयो । रासायनिक विषादीको प्रयोग नगर्न उहाँले किसानलाई सुझावसमेत दिनुभयो । कर्णालीमा करिब ५० प्रतिशत माटो अस्वस्थ रहेको देखिएको हुँदा प्रत्येक बालीपछि माटो परीक्षण पनि गर्नुपर्ने उहाँको भनाइ छ ।
एकीकृत कृषि प्रयोगशाला सुर्खेतका प्रमुख चित्रबहादुर रोकायले रासायनिक विषादी क्यान्सर रोगका कारक भएकाले प्रयोगलाई हतोत्साही गर्नुपर्ने बताउनुभयो । उहाँले कर्णालीको सुर्खेतको वराहताल कुनाथरीको नयाँवन, दैलेखको नारायण नगरपालिका र सल्यानको कपुरकोटमा प्राङ्गारिक कृषिबारे सचेतना दिँदै घरेलु तथा जैविक विषादीको प्रयोगबारे जानकारी गराइने जनाउनुभयो । हालसम्म एक सयको हाराहारीमा शुद्ध प्राङ्गारिक कृषि खेती गर्ने कृषक भएको पाइएको भन्दै उहाँले रासायनिक विषादीको प्रयोगलाई घटाउँदै लैजाने प्रयास पनि थालिएको उल्लेख गर्नुभयो ।
प्रधानमन्त्री कृषि आधुनिकीकरण परियोजनाका बालीविज्ञ वेदप्रसाद चौलागाईंले उत्पादन बढाउन प्रयोग गरिने रासायनिक विषादी औषधी नभई विष भएको बताउनुभयो । रासायनिक विषादीको प्रयोग गर्नुपर्ने बाध्यता रहे पनि स्थानीय, प्रदेश र सङ्घ सरकारले पनि रासायनिक विषादी प्रयोगलाई कमी ल्याउन सचेतनाका कार्यक्रमहरू ल्याउनुपर्ने उहाँको भनाइ छ ।
