सन्तोष राउत
सोलुखुम्बु, फागुन १९ गते । नेकपा (एमाले) का उपमहासचिव प्रदीप ज्ञवालीले देश विकासका लागि काँग्रेस–एमाले नेतृत्वको सरकार गठन भएकोे बताउनुभएको छ । नेपाल कम्युनिस्ट पार्टी (एमाले) सोलुखुम्बुले सोमबारदेखि आयोजना गरेको जिल्लास्तरीय प्रशिक्षण कार्यक्रममा उपमहासचिव ज्ञवालीले एमाले नेतृत्वको सरकारले जनताको हितमा उल्लेखनीय काम गरेको बताउनुभयो ।
देश विकासका लागि एमाले र कांग्रेस मिलेर तीब्र रुपमा काम गरिरहेको उपमहासचिव ज्ञवालीको भनाइ छ । वर्तमान सरकारले नै सहकारीमा फसेका १४ हजारभन्दा धेरै नागरिकको डुबेको रकम फिर्ता गरिसकेको उहाँले स्पष्ट पार्नुभयो ।
प्रधानमन्त्रीबाट हटेलगत्तै माओवादी केन्द्रका अध्यक्ष पुष्पकमल दाहाल ‘प्रचण्ड’ ले नेपाल बंगलादेशजस्तो हुने भन्दै आरोप लगाए पनि अहिले मुलुक विकासको पथमा अघि बढेको नेता ज्ञवालीले बताउनुभयो । प्रचण्डले आफू प्रधानमन्त्रीबाट हटेसँगै कोशी प्रदेशको पुनः नामकरण गर्नुपर्ने भन्दै भ्रमको खेती गरेको उहाँले टिप्पणी गर्नुभयो ।
देशमा विकास भइरहेको भए पनि पछिल्लो समय भ्रमको खेती व्यापक हुन थालेको उहाँको प्रतिक्रिया छ । भौगोलिक हिसाबमा बिकास गर्न कठिन भए पनि देशको ७७ जिल्ला सडक सञ्जालमा जोडिएको उहाँले बताउनुभयो ।
एमालेले देश र जनताप्रतिको भावनाअनुरुप काम गर्ने ज्ञवालीले बताउनुभयो । वर्तमान सरकार आएसँगै देशमा राजस्व सङ्कलनमा समेत वृद्धि भएको उहाँको दाबी छ । त्यस्तै, नागरिक अपडेट रहन पुस्तक पढ्ने बानीको अनिवार्य रूपमा आवश्यकता रहेको ज्ञवालीले बताउनुभयो ।
एमाले पार्टी कार्यालय सल्लेरीमा हुने जिल्लास्तरीय तीन दिने प्रशिक्षण कार्यक्रममा उपमहासचिव ज्ञवाली, पार्टी सचिव घनश्याम कोइराला र केन्द्रिय सदस्य परशुुमेघी गुरुङले प्रशिक्षण दिनुहुनेछ ।
आधारभूत तहको नेपाल कम्युनिष्ट पार्टी एमाले प्रशिक्षण विभागले तयारी गरेको पाठयक्रममा आधारित भएर प्रशिक्षण हुने नेकपा (एमाले) जिल्ला कमिटी अध्यक्ष डुफकुमार बास्तोलाले जानकारी दिनुभयो ।
