पवन मिष्ठानको अखाद्य खुवा बरामद

सीता काफ्ले 

तिनाउ (रुपन्देही), फागुन १४ गते । रुपन्देहीको भैरहवास्थित पवन मिष्टान्न भण्डारले खाद्य स्वच्छता तथा गुणस्तर ऐन २०८१ विपरीत पेडा बनाउन प्रयोग गरिने खुवा ढुवानी गर्ने गरेको पाइएको छ । 

जिल्ला बजार अनुगमन समिति रुपन्देहीले भैरहवाका मिष्टान्न पसलहरूमा अनुगमन गर्दा पवन मिष्टान्न भण्डारले पेडा बनाउने कच्चा पदार्थ खुवालाई प्लाष्टिकमा पोका पारेर चिनीको बोरामा लादेर ल्याएर राखेको अवस्थामा मिष्टान्न भण्डारबाट बरामद गरिएको सहायक प्रमुख जिल्ला अधिकारी अयोध्या भण्डारीले जानकारी दिनुभयो ।

उहाँले पवनबाट बरामद गरिएको ८० केजी खुवालाई खाद्य प्रविधि तथा गुण नियन्त्रण कार्यालय भैरहवाका खाद्य निरीक्षण अधिकारी गौरी हमाल र सुरक्षा अधिकारीको उपस्थितिमा नष्ट गरिएको बताउनु भयो । 

सहायक प्रजिअ भण्डारीको नेतृत्वमा गएको खाद्य बजार निरीक्षण तथा अनुगमन समितिले भैरहवाका ३ वटा मिठाई पसलहरूको अनुगमन गरेको थियो । 

अनुगमन समितिले पवन मिष्टान्न भण्डार सहित नन्दन स्वीट्स र सावरिया मिष्टान्न पसलको अनुगमन गरेको जनाएको छ । 

पवन मिष्टान्न भण्डारले पेडा बनाउनका लागि प्रयोग गर्ने कच्चा पदार्थ खुवा खाद्य स्वच्छता तथा गुणस्तर ऐन २०८१ विपरीत ढुवानी गर्ने गरेको खाद्य प्रविधि तथा गुण नियन्त्रण कार्यालय भैरहवाका खाद्य निरीक्षण अधिकारी गौरी हमालले जानकारी दिनुभयो । 

उहाँले पवन मिष्ठान्नले ढुवानी गरेको पेडा बनाउने कच्चा पदार्थ खुवा ल्याउँदा लेभल नलगाई, सामान्य तापक्रमको ख्यालै नगरी पलाष्टिकमा लादेर बोरामा ल्याएको अवस्थामा फेला परेकाले खाद्य स्वच्छता तथा गुणस्तर ऐन अनुसार कारबाही गरिने बताउनु भयो । 

पवन मिष्टान्न भण्डारका सञ्चालक पवन हलुवाइले मर्चवार र त्रिवेणि क्षेत्रमा दूध सङ्कलन गरी खुवा बनाएर  ल्याउने गरेको बताउनु भयो । उहाँले प्लाष्टिकमा राखेर ल्याउनु कमजोरी भएको बताउँदै अखाद्य बस्तु नमिसाइएको दाबी गर्दै गुणस्तरमा कुनै कमी नरहेको बताउनु भयो ।