ताप्लेजुङ समाचारदाता
ताप्लेजुङ, फागुन ८ गते । नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठ ‘प्रकाश’ ले आफ्नो पार्टी अहिले सरकार बनाउने र ढाल्ने खेलमा नरहेको बताउनुभएको छ । केपी शर्मा ओली नेतृत्वको वर्तमान सरकारप्रति जनताको आशा र भरोसा नभए पनि माओवादी तत्काल सरकार बनाउने र गिराउने पक्षमा नरहेको श्रेष्ठले स्पष्ट पार्नुभयो ।
प्रेस सेन्टर नेपाल ताप्लेजुङले सदरमुकाम फुङ्लिङमा बुधबार आयोजना गरेको पत्रकार भेटघाटमा सरकार बनाउन र ढाल्नभन्दा माओवादी पार्टीलाई मजबुत र सुदृढ बनाउने अभियानमा केन्द्रित रहेको श्रेष्ठले बताउनुभयो । पछिल्लो समय माओवादीप्रति जनलहर बढ्दै गएकाले जनताको आशा भरोसा पनि माओवादीसँगै रहेको उहाँको भनाइ छ ।
पूर्वउपप्रधान तथा गृहमन्त्रीसमेत रहनुभएका नेता श्रेष्ठले पार्टीले सुदृढीकरण अभियान चलाउन थालेपछि माओवादी बलियो बन्दै गएको दाबी पनि गर्नुभयो । वर्तमान सरकारले जनताको अपेक्षा अनुसार काम गर्न नसकेकाले माओवादीप्रति जनताको भरोसा बढ्दै गएको उहाँले बताउनुभयो ।
नेता श्रेष्ठले वर्तमान सरकार निरङ्कुश बन्दै गएको पनि आरोप लगाउनुभयो । संसद् अधिवेशन बोलाउने बेला संसद्लाई छलेर सरकारले अध्यादेश ल्याउनु गलत भएको उहाँको भनाइ छ । उहाँले भन्नुभयो, “परिस्थितिजन्य अवस्थामा तत्काल कुनै पनि समस्याको समाधान गर्नुपर्ने भएमा अध्यादेशमार्फत कानुन बनाउन सकिने संविधानमा व्यवस्था भए पनि त्यसविपरीत सरकारले अध्यादेश ल्याएको छ ।”
उहाँले देशको विकास, समृद्धि तथा समग्र जनताको हितमा माओवादी पार्टी भएकाले प्राप्त उपलब्धि र संविधानको मूल मर्मको रक्षा हुने गरी माओवादी संविधान संशोधनको पक्षमा रहेकोसमेत स्पष्ट पार्नुभयो । उहाँले सबै जाति, वर्ग र क्षेत्रको पक्षमा र थप जनमुखी साथै निर्वाचित कार्यकारी राष्ट्र प्रमुख तथा पूर्ण समानुपातिक निर्वाचन प्रणाली हुने गरी संविधान संशोधन गर्न माओवादी तयार रहेको बताउनुभयो ।
उहाँले दलीय व्यवस्था हुने गरी थ्रेसहोल्ड बढाउन खोज्नु, नियमनका नाउँमा बोल्नै नपाउने र लेख्नै नपाउने गरी सामाजिक सञ्जाल विधेयक ल्याउनु पनि गलत भएको उहाँको भनाइ छ । भ्रष्टाचारीलाई संरक्षण गर्ने, समानुपातिक र समावेशिता व्यवस्थाको प्रतिकूल हुने गरी कुनै कार्य नगर्न उहाँले सरकारलाई सुझाव पनि दिनुभयो ।
उहाँले ताप्लेजुङको पाथीभरामा निर्माण गर्न लागेको केबुलकार योजनाका विषयमा गोली चल्नु दुःखद भएको टिप्पणी गर्नुभयो । स्थानीय समुदायको भावना र मागलाई सम्बोधन गरेर मात्र केबुलकार बनाउनुपर्नेमा जोड दिँदै वार्ताकै माध्यमबाट समस्याको समाधान खोज्नुपर्ने पनि उहाँले बताउनुभयो । नेता श्रेष्ठ बुधबार सुरु भएको माओवादी केन्द्र मैवाखोला गाउँपालिका कमिटीको अधिवेशन उद्घाटनका क्रममा ताप्लेजुङ आउनुभएको हो ।
