काठमाडौँ, माघ १४ गते । तेस्रो संस्करणको केपी ओली कप फुटबल प्रतियोगिता आगामी फागुनको दोस्रो साता हुने भएको छ ।
राष्ट्रिय युवा सङ्घ नेपालको आयोजनाम फागुन ११ देखि १९ गतेसम्म सञ्चालन हुने प्रतियोगितामा नेपालका ‘ए’ डिभिजनसहित भारत, भुटान र उज्वेकिस्तानका गरी १० टोलीको सहभागिता रहने बुधबार आयोजित पत्रकार सम्मेलनमा सङ्घका अध्यक्ष क्षितिज थेबेले जानकारी दिनुभयो ।
प्रतियोगिताको विजेता टोलीलाई १५ लाख ११ हजार एक सय ११ रुपियाँ र उपविजेतालाई पाँच लाख रुपियाँ प्रदान गनिनेछ । यस्तै सर्वोत्कृष्ट खेलाडीलाई एक लाख तथा उत्कृष्ट गोल रक्षक, सर्वाधिक गोलकता र उदयीमान खेलाडीलाई ५० हजार रुपियाँ पुरस्कार प्रदान गरिने छ ।
‘म्यान अफ दि म्याच’ लाई १५ हजार र हरेक खेलको विजेता टिमलाई २५ हजार रुपियाँ प्रदान गरिने आयोजकले जनाएको छ । पहिलो चरणका खेल एन्फा मैदान सातदोबाटो तथा सेमिफाइनल र फाइनल खेल त्रिपुरेश्वरस्थित दशरथ रङ्गशालामा हुनेछ । प्रतियोगितालाई अखिल नेपाल फुटबल सङ्घ (एन्फा) ले प्राविधिक सहयोग गर्नेछ ।
