इटहरी, माघ १५ गते । गोरखापत्रका कोशी प्रदेश संयोजक सचिन पोख्रेल सम्मानित हुनुभएको छ। जनता माद्यमिक विद्यालयको ६८ औँ वार्षिकोत्सवको अवसरमा इटहरीमा आयोजित कार्यक्रममा पूर्व राष्ट्रपति विद्यादेवी भण्डारीले पत्रकार पोखरेललाई सम्मान गर्नुभएको हो । उहाँ गोरखापत्र संस्थानसञ्चालक समिति सदस्यसमेत हुनुहुन्छ ।
विगत तीन दशकदेखि पत्रकारिता क्षेत्रमा सक्रिय पत्रकार पोख्रेलले २०५५ साल माघ २१ गतेदेखि गोरखापत्रको सुनसरी समाचारदाताका रूपमा काम गर्दै आउनु भएको छ। पोखरेल जनता माध्यमिक विद्यालयका पूर्व विद्यार्थी हुनुहुन्छ।
कार्यक्रममा राष्ट्रपति भण्डारीले नेपाल पत्रकार महासङ्घ सुनसरीका अध्यक्ष सन्तोष काफ्लेलाई सम्मान गर्नुभएको थियो ।
कार्यक्रममा प्रतिनिधि सभा सदस्य भगवती चौधरी, कोशी प्रदेश सरकारका आन्तरिक मामिला तथा कानुनमन्त्री रेवतीरमण भण्डारी, सामाजिक विकासमन्त्री पाँचकर्ण राई, प्रदेश सभा सदस्य, इटहरी उपमहानगरपालिकाका प्रमुख हेमकर्ण पौडेललगायत विभिन्न स्थानीय जनप्रतिनिधि, विद्यार्थी र अभिभावकको उपस्थिति थियो।
