रजनी योगी
सुर्खेत, पुस १८ गते । चालु आर्थिक वर्षभित्रमा कर्णाली प्रदेशभर ९० वटा झोलुङ्गे पुल निर्माण गरिने भएको छ । यीमध्ये कतिपय गत वर्षका निर्माणाधीन योजना रहेको र कतिपय अहिले थप भएका प्रदेश सरकारले जनाएको छ ।
पुराना सम्पन्न हुने र नयाँ योजना थपिँदै जानु नियमित नै हुने भौतिक पूर्वाधार तथा सहरी विकास मन्त्रालयले जनाएको छ । जस अनुसार यो वर्ष ९० वटा नयाँ पुल निर्माण गर्ने लक्ष्य प्रदेश सरकारले राखेको छ । भौगोलिक रूपले विकट र दुर्गम स्थानका जनताको यातायात सेवाको पहुँचमा सहजता एवं सुधार गर्न झोलुङ्गे पुल निर्माण गर्न लागिएको हो । सङ्घ र स्थानीय तहसँग सहकार्य गरी आधा घण्टाको हिँडाइको दुरीभित्र पहुँच सुविधा पुर्याउने लक्ष्य राखिएको छ ।
चालु आवमा पुल निर्माणका लागि प्रदेश सरकारले २० करोड ५० लाख रुपियाँ विनियोजन गरेको छ । यो वर्ष ४२ वटा नयाँ पुल निर्माणका लागि बजेटको स्रोत सुनिश्चित गरिएको मन्त्रालयका सूचना अधिकारी प्रवीण कार्कीले बताउनुभयो । अहिलेसम्म कम्तीमा प्रत्येक आधा घण्टामा झोलुङ्गे पुल हुने गरी निर्माण गरिरहेको जानकारी उहाँले दिनुभयो । सरकारले एक घण्टाको फेरोमा झोलुङ्गे पुल हुनुपर्ने मापदण्ड परिवर्तन गरेर अहिले आधा घण्टामा पुग्ने गरी पुल निर्माणको काम गरिरहेको छ । नागरिकले सजिलै र छिटो सेवा सुविधा पाउनुपर्ने मान्यताका आधारमा पुल निर्माण गर्न लागिएको कार्कीले बताउनुभयो ।
प्रदेश सरकारले खासगरी ग्रामीण क्षेत्रमा नागरिकलाई नदी पार गर्न झोलुङ्गे पुल निर्माण गरिरहेको छ । सडकको सुविधा नपुगेको वा पुगे पनि तत्काल सडक पुल निर्माणको सम्भावना नरहेको ठाउँमा झोलुङ्गे पुल निर्माण भइरहेको छ । नागरिकलाई आवागमनका लागि बनाइएका दुर्गम स्थानका कतिपय पुल पछिल्लो समयमा पर्यटन प्रवर्धनको माध्यमसमेत बन्दै गएको पाइएको छ ।
प्रत्येक वर्ष निरन्तरता
प्रदेश सरकारले प्रत्येक वर्ष पुल निर्माण गरिरहेको छ । प्रदेश सरकार, सङ्घीय ससर्त अनुदानमार्फत कर्णाली प्रदेशका १० जिल्लामा पुल निर्माण भइरहेका छन् । गत आर्थिक वर्ष २०८०/८१ मा २७ वटा झोलुङ्गे पुल निर्माण सम्पन्न भएका थिए । उक्त वर्ष ९४ वटा पुल निर्माण गर्ने सरकारको लक्ष्य थियो ।
त्यसै गरी आव २०७८/७९ मा ७७ वटा पुल निर्माण भएको थियो भने आव २०७९/८० मा १०७ वटा पुल निर्माण गरिएको भौतिक मन्त्रालयले जनाएको छ । नागरिकलाई सहज रूपमा कम जोखिमपूर्ण यात्रा होस् भनेर प्रदेश सरकार स्थापना भएपछि नै निरन्तर पुल निर्माणमा लागिरहेको हो । यो वर्ष ९० वटा पुल निर्माण गर्ने लक्ष्य लिइएको छ । जसमध्ये ४२ वटा नयाँ पुलको स्रोत सुनिश्चित भएको छ ।
