पुरस्कार प्रदान

गोरखापत्र समाचारदाता

काठमाडौँ, पुस १४ गते । तामाङ जनप्रतिनिधिका बारेमा लेखिएको पुस्तक लोकार्पण गरिएको छ । तामाङ पत्रकार सङ्घको सातौँ महाधिवेशनका अवसरमा शनिबार राजधानीमा आयोजित कार्यक्रममा ऊर्जा राज्यमन्त्री पूर्णबहादुर तामाङ (कान्छाराम), नेपाली कांग्रेसका सचेतक सुशीला थिङ, बागमती प्रदेशका सदस्य माइली तामाङलगायतले उक्त पुस्तक संयुक्त रूपमा लोकार्पण गर्नुभएको हो । 

तामाङ पत्रकार सङ्घका पूर्वअध्यक्ष जगतमान लामालाई पत्रकारिता र डम्फु सेलो कार्यक्रममार्फत मातृभाषाको प्रवर्धनमा पुर्‍याउनुभएको योगदानका लागि १५ हजार रुपियाँसहित रवीन्द्र तामाङ पत्रकारिता पुरस्कार प्रदान गरिएको छ ।

त्यसै गरी पत्रकार, लेखक एवं चलचित्रकर्मी दीपेन्द्र दोङको सम्झनामा स्थापना गरिएको दीपेन्द्र दोङ स्मृति पुरस्कारबाट कालिञ्चोक एफएमका स्टेसन व्यवस्थापक एवं पत्रकार जीवन लामा, तामाङ मातृभाषा पत्रकारिता पुरस्कारबाट पत्रकार अस्मी तामाङलाई जनही १०/१० हजार रुपियाँसहित सम्मानपत्र प्रदान गरिएको छ । 

ऊर्जा राज्यमन्त्री पूर्णबहादुर तामाङले पत्रकारिताको माध्यमबाट देश, समाज र समुदायको हितका लागि काम गरिरहेका पत्रकारहरू एकजुट हुने अवसर तामाङ पत्रकारहरूको साझा सङ्गठन तामाङ पत्रकार सङ्घले प्रदान गरेको बताउनुभयो ।

नेपाली कांग्रेसका सचेतक सुशीला थिङले पत्रकारिता समाजको ऐनाका रूपमा रहेकोमा तामाङ पत्रकारहरूको भूमिका समुदायमा विद्यमान सकारात्मक अभ्यासलाई प्रवर्धन गर्दै जानुपर्ने बताउनुभयो । तामाङ पत्रकार सङ्घका संस्थापक लेखक, अन्वेषक रवीन्द्र ग्यावकले देशभर छरिएर रहेका तामाङ पत्रकारहरूलाई सङ्गठित बनाउने कामलाई सङ्घले अझै तीव्रताका साथ अगाडि बढाउनुपर्ने बताउनुभयो ।