न हेर्न सक्छन्
न बोल्न सक्छन्
न सुन्न सक्छन्
न हिँड्न सक्छन्
न केही गर्न सक्छन्
गजधम्म परेका छन्
सदियौँदेखि चुपचाप बसेका छन्
यहाँ ढुङ्गाहरू देउता भएका छन् ।
उसकै अगाडि चेलीहरूको अस्मिता लुटिन्छ
ऊ बलात्कारीहरूलाई समाउन सक्दैन
उसकै अगाडि चोरहरू चोरी गरिरहेका हुन्छन्
ऊ तिनीहरूलाई दण्ड दिन सक्दैन
उसकै अगाडि बाढी आउँछ
आगलागी हुन्छ
भूकम्प जान्छ र हजारौँ मान्छे मर्छन्
ऊ उद्धार गर्न सक्दैन
उसकै अगाडि न्यायको किनबेच भइरहेको हुन्छ
र निर्दोषहरू जेल परिरहेका हुन्छन्
ऊ अन्यायमा पर्नेहरूलाई निसाफ दिन सक्दैन
र न्याय बिक्री गर्नेहरूलाई कारबाही गर्न सक्दैन
ऊ मात्र ट्वाल्ल परिरहन्छ
यहाँ ढुङ्गाहरू देउता भएका छन् ।
उसकै अगाडि मान्छे मान्छेमा विभेद भइरहेको हुन्छ
उसलाई थाहा हुँदैन
उसकै अगाडि उत्तीर्ण हुनुपर्ने अनुत्तीर्ण
र अनुत्तीर्ण हुनुपर्ने उत्तीर्ण भइरहेका हुन्छन्
ऊ सही मूल्याङ्कन गर्न सक्दैन
उसकै अगाडि उसको नाममा
धर्मका व्यापारीहरूले अर्बौं कमाइरहेका हुन्छन्
ऊ तिनीहरूलाई बन्देज लगाउन सक्दैन
उसकै अगाडि कठोर श्रम गर्नेहरू भोकभोकै मरिरहेका हुन्छन्
र एक थोपा पसिना पनि नबगाउनेहरू मोजमस्ती गरिरहेका हुन्छन्
ऊ उसलाई आरती गर्नेहरूको भिडमा हुन्छ
ऊ उसलाई भजन गर्नेहरूबाट घेरिएको हुन्छ
यहाँ ढुङ्गाहरू देउता भएका छन् ।
मलाई यस्ता देउताहरू चाहिएको छैन
जो ढुङ्गाले जस्तै केही पनि गर्न सक्दैनन्
म जिउँदा जाग्दा देउताहरूको खोजीमा छु
जो मान्छेले जस्तै सबथोक गर्न सक्छन् ।
