गोरखापत्र समाचारदाता
काठमाडौँ, मङ्सिर २९ गते । पश्चिम क्षेत्रमा निर्माण हुने जलविद्युत् आयोजनाको विद्युत् प्रवाह गर्न र नेपाल–भारतबिचको द्विपक्षीय तथा क्षेत्रीय विद्युत् व्यापार विस्तारका लागि उपयोगमा ल्याएने नयाँ बुटवल–बर्दघाट २२० केभी डबल सर्किट प्रसारण लाइन सञ्चालनमा आएको छ ।
नवलपरासी (बर्दघाट सुस्ता पश्चिम) को सुनवल नगरपालिका–१३, सूर्यबस्तीस्थित नयाँ बुटवल सबस्टेसनबाट सोही जिल्लाको बर्दघाट नगरपालिका–५ सम्मको साढे २१ किलोमिटर प्रसारण लाइन निर्माण सम्पन्न गरी बिहीबारदेखि सञ्चालनमा ल्याइएको नेपाल विद्युत् प्राधिकरणले जनाएको छ । चितवनको भरतपुर महानगरपालिका–११, आँपटारीस्थित नयाँ भरतपुर सबस्टेसनदेखि नयाँ बुटवलसम्मको २२० केभी प्रसारण लाइनलाई चार्ज गरिएको हो । नयाँ बुटवल–बर्दघाट प्रसारण लाइन सञ्चालनमा आएसँगै नयाँ बुटवलबाट हेटौँडासम्म २२० केभी प्रसारण लाइन पूर्वाधार संरचना तयार भएको छ । प्रसारण लाइनले करिब एक हजार दुई सय मेगावाट विद्युत् भार बोक्न सक्ने छ ।
कालीगण्डकी र यसका सहायक नदीहरूमा निर्माण हुने जलविद्युत् आयोजनाको विद्युत् एकीकृत गरी राष्ट्रिय प्रणालीमा समाहित गर्न म्याग्दीको दानाबाट सुरु भई नयाँ बुटवल सबस्टेसनमा अन्त्य हुने कालीगण्डकी कोरिडोर र नयाँ बुटवल–नयाँ भरतपुर–हैटौँडासम्मको २२० केभी प्रसारण लाइन लिङ्क बनेको छ । नेपाल विद्युत् प्राधिकरणका कार्यकारी निर्देशक कुलमान घिसिङले भरतपुरबाट पूर्वपश्चिम विद्युत् प्रवाहका लागि २२० केभीको मेरुदण्ड तयार भएको र यसबाट भोल्टेजमा सुधार भई समग्र प्रणालीको विश्वसनीयता बढ्ने बताउनुभयो ।
नेपाल विद्युत् प्राधिरणका कार्यकारी निर्देशक घिसिङका अनुसार यस प्रसारण लाइनमार्फत आन्तरिक रूपमा खपत गरी अतिरिक्त भएको वर्षायामको विद्युत् ढल्केबर हुँदै भारत निर्यात गर्न र हिउँदमा अपुग विद्युत् आयात गरी पश्चिमतर्फ पठाउन सहज हुने छ । त्यस्तै कालीगण्डकी तथा मस्र्याङ्दी र ती नदीका सहायक खोलानालाबाट उत्पादित विद्युत् प्रवाहका लागि सहज हुने छ ।
मस्र्याङ्दी नदी जलाधार क्षेत्रमा निर्माण हुने जलविद्युत् आयोजनाबाट उत्पादित विद्युत् मस्र्याङ्दी करिडोर २२० केभी प्रसारण लाइन हुँदै नयाँ भरतपुर सबस्टेसनमा समाहित हुने छ । नयाँ भरतपुरबाट विद्युत्लाई हेडौँडा र नयाँ बुटवलतर्फ पठाउन सकिने छ । भारतसँगको नयाँ बुटवल–गोरखपुर चार सय केभी दोस्रो अन्तरदेशीय प्रसारण लाइन निर्माणाधीन छ ।
मुस्ताङमा फास्ट चार्जिङ स्टेसन
भिजी मोटर्सले मुस्ताङको आठ हजार ९९९ फिट उचाइमा विद्युतीय सवारीसाधनको फास्ट चार्जिङ स्टेसन सञ्चालनमा ल्याएको छ । मुस्ताङ गाउँपालिकाका अध्यक्ष मोहनसिंह लालचनले उक्त चार्जिङ स्टेसनको उद्घाटनको गर्नुभयोे ।
उक्त चार्जिङ स्टेसनमा ३२ किलोवाट क्षमताको एउटा डिसी फास्ट चार्जर राखिएको छ । यसले ४५ मिनेटमै विद्युतीय सवारीसाधनको ब्याट्री फुल चार्ज गर्न सक्ने जनाइएको छ । यसबाट विद्युतीय सवारीसाधन लिएर मुस्ताङ पुग्ने यात्रु तथा मुस्ताङका विद्युतीय सवारी प्रयोगकर्तालाई सुविधा हुने छ ।
