राजकुमार भट्टराई
खोटाङ, मङ्सिर ६ गते । खोटाङमा आगलागीबाट एक घर जलेर नष्ट भएको छ । रावा बेसी गाउँपालिका–४ डुम्रेधारापानीका इन्द्रबहादुर भुजेलको घर आगलागीबाट जलेर नष्ट भएको हो ।
बुधबार राती ८ः१५ बजेको समयमा घरमा आगलागी भएको जानकारी आएको जिल्ला प्रहरी कार्यालय खोटाङले जनाएको छ । जानकारी आएलगत्तै नजिकै रहेको डुम्रेधारापानी प्रहरी चौकी घटनास्थलमा पुगेको जिल्ला प्रहरी कार्यालय खोटाङका सूचना अधिकारी प्रहरी निरीक्षक मोहन पोखरेलले बताउनुभयो । प्रहरी र स्थानीयको सहयोगमा आगो राति साढे १० बजे नियन्त्रणमा आएको उहाँको भनाइ छ ।
आगलागीबाट इन्द्रबहादुर भुजेलको ढुङ्गा माटोले बनेको, जस्ताको छानो भएको २ तले घर जलेर पूर्णरुपमा नष्ट भएको छ । घरसँगै घरभित्र भएको अन्नपात, लत्ताकपडा, भाँडाकुँडा जलेर नष्ट हुँदा ५ लाख बराबरको क्षति भएको प्रहरीले जनाएको छ । आगलागीको कारण खुल्न नसकेको प्रहरीको भनाइ छ ।
घरमा कोही नभएको समयमा आगलागी भएको डुम्रेधारापानीका वडाध्यक्ष ज्ञानबहादुर पाण्डेले बताउनुभयो । भुजेल परिवार धानखेतको कामले कटहरे बेँसीमा कटेरोमा बस्दै आएका थिए । चावि लगाइरहेको घरमा राति एक्कासि लागलागी भएर भुजेल परिवार घरविहीन भएको उहाँको भनाइ छ । पालिकासँगको सहकार्यमा तत्काल राहत उपलब्ध गराइने तयारी भएको वडाध्यक्ष पाण्डेले बताउनुभयो ।
