साँझतिर घर फर्कंदा चराका बथानका बथान
सधैँ बस्ने रुखका हाँगा हाँगामा
बेतोडले भित्रैदेखि चिच्च्याई चिच्च्याई चहचहाइरहेका थिए ।
चराहरू बस्ने त्यो हाँगा बरको हुन सक्छ
चराहरूको बास्ने त्यो हाँगा पिपलको पनि हुन सक्छ
फलाना÷ढिस्कानाको कुरा भएन
सबै सबै रुखहरू सबै सबै चराका बासस्थान हुन् ।
लाग्न थालेको धेरै भो– आज मात्रै कराएका पक्कै होइनन् चराहरू
मान्छेहरूभन्दा पहिले नै गाउन÷कराउन जानेका हुन् चराहरूले
चराहरू सायद धरतीको गीत गाउन आए हुनन्
लाग्छ, चराहरू यो पृथ्वीकै रक्षा गर्न आए हुनन्
चराहरू भएर धरती भएको होला !
आजै किन यस्तरी कराए हँ चराहरू ?
सायद अब धरती डोलायमान हुने सङ्केत हुन सक्छ
घना रुखहरू छैनन्÷छैनन् सुरम्य आबहवा
मरुद्यानको रूपान्तरणमा शस्य श्यामल धरती गलहत्याइएको छ
कालातीत निस्तब्धता ओढेर
मुर्दाशान्तिको अन्तिम फाँकी गीत गाइरहेछन् चराहरू ।
यावत् चराका समवेत स्वरहरूमा–
कुनै चराका स्वर आकाश मैलिएकोमा जाहेरी गरे जस्तो छ
कुनै चराका स्वर पोखरी सुकेकामा खबरदारी चिच्याए जस्तो छ
कुनै चराका स्वर सबै खोला बगर पल्टेकामा चिन्तातुर जस्तो छ
कुनै चराका स्वर जङ्गली डाँडाहरूसम्म भएकामा भयातुर भएको जस्तो छ
कुनै चराका स्वर हिमालहरू फगत पत्थरिला हुँदै गएकामा
अत्यास जागेको जस्तो छ
जुनै चराका समवेत स्वर पृथ्वीको अधोगतिको समूह गान पो हो कि !
सुनेदेखि नै चराहरूको अस्वाभाविक चिच्याइलाई
अपसकुन माने बाजेबराजुले ।
चराहरू रमाएको सबैलाई रमाइलोमाथि रमाइलो
चराहरू चिच्याएको सबैलाई रमाइलो÷नरमाइलो
चराहरू रमाउनु÷चिच्याउनुको अभिधार्थ
चराहरू गुनगुनाउनुको लक्षणार्थ
चराहरू भुन्भुनाउनुको व्यञ्जनार्थ
चराहरू रमाएका छैनन्
चराहरू रत्तिएका छैनन् ।
चराहरू जब रमाएकै छैनन् धरती कस्तो होला
चराहरू जम्जमाएका छैनन् जङ्गल कस्तो होला
चराहरू डुबुल्की खेलेका छैनन् तलाउ कहाँ होला
चराहरू उतर्सिएका बेला कुन कलरवको निनाद गुन्जेला र !
चराहरू बिच्किएका बेला कुन सङ्गीतको साज सजिएला र !!
चराहरूका कलरव ध्वनि भङ्ग भएका बेला
निदाउन बाँकी निद्राको लय खल्बलिएको छ
चराका चिरबिरबिना जस्केलो टेक्न बिहान हच्केको छ
गाँसको पहिलो चोइली खान चराहरू अब जुठेल्नामा आउन हतार गर्दैनन्
हुँदा हुँदा क्षितिजको रक्ताभमा चराहरूका कालो छायाँदार लहरहरू
बन्छ बन्दैनन् शङ्काको घेरामा छु !
