उम्मेदवार छनोट गर्दै दलहरू

गोरखापत्र समाचारदाता 

काठमाडौँ, कात्तिक २१ गते । प्रमुख राजनीतिक दलले स्थानीय तहको मङ्सिर १६ गते हुने उपनिर्वाचनका लागि उम्मेदवार तय गर्न थालेका छन् । सत्तारूढ नेपाली कांग्रेस, नेपाल कम्युनिस्ट पार्टी (एमाले) तथा प्रमुख प्रतिपक्षी नेपाल कम्युनिस्ट पार्टी (माओवादी केन्द्र) सहितका दलले स्थानीय तहको उपनिर्वाचनका लागि उम्मेदवार छनोट आरम्भ गरेका हुन् । 

कोशी प्रदेशमा गाउँपालिकाका एक अध्यक्ष र छ वडाध्यक्ष, मधेश प्रदेशमा छ वडाध्यक्ष, बागमती प्रदेशमा एक नगरपालिका प्रमुख, एक गाउँपालिका उपाध्यक्ष र एक महानगरपालिकाका वडाध्यक्षसहित पाँच वडाध्यक्ष पदमा उपनिर्वाचन हुँदै छ । गण्डकी प्रदेशमा एक वडाध्यक्ष, लुम्बिनी प्रदेशमा तीन वडाध्यक्ष, कर्णाली प्रदेशमा एक नगरपालिका उपप्रमुख, एक गाउँपालिका अध्यक्ष, एक उपाध्यक्ष र पाँच वडाध्यक्ष र सुदूरपश्चिम प्रदेशमा एक उपाध्यक्ष र चार वडाध्यक्षसहित ४४ पदमा उपनिर्वाचन हुँदै छ ।

कीर्तिपुरमा चुनावी सरगर्मी

कीर्तिपुर नगरपालिका प्रमुखमा हुने निर्वाचनका लागि कांग्रेस, एमाले र माओवादी केन्द्रले उम्मेदवार सिफारिस गरेका छन् । कांग्रेस नगर कार्यसमितिले नगर सभापति कृष्णमान डङ्गोल, बद्रीलाल महर्जन, हिमाल कार्की, पूर्वनगरप्रमुख स्व. राजकुमार नकर्मीकी पत्नी जमुना नकर्मीलाई उम्मेदवार सिफारिस गरेको छ । 

त्यसै गरी सङ्गीता बोगटी, सशीर महर्जन, राममान सिंह, जनकलाल महर्जन, मीनप्रकाश महर्जन, किरण केसी र सचिन्द्र महर्जनलाई नगरप्रमुखको उम्मेदवारका लागि सिफारिस गरेको छ । वडा नं. १ मा छ जना र वडा नं. ४ बाट आठ जनाको नाम सिफारिस भएको छ । नगर सभापति डङ्गोलले भन्नुभयो, “नगरले क्षेत्रलाई ११ जनाको नाम सिफारिस गरेको हो । अब क्षेत्रले जिल्लालाई अनि प्रदेश र केन्द्रमा सिफारिस हुन्छ । त्यसपछि उम्मेदवारको नाम तय हुन्छ ।” एमाले बागमती प्रदेश अध्यक्ष कैलाशचन्द्र ढुङ्गेलका अनुसार एमाले नेता डा. सुरेन्द्र मानन्धरलाई कीर्तिपुर नगरप्रमुखको उम्मेदवार बनाउने निर्णय भएको छ । उहाँले प्रदेशका अन्य उम्मेदवार तय गर्न पनि छलफल भइरहेको बताउनुभयो । माओवादी केन्द्रका उपाध्यक्ष अग्निप्रसाद सापकोटाका अनुसार कीर्तिपुर नगरप्रमुखको उम्मेदवार सो पार्टीले प्राडा शिवशरण महर्जनलाई बनाउने भएको छ । माओवादीले वडाध्यक्षमा पनि उम्मेदवार तय गरेको छ । 

माओवादी बागमती प्रदेश अध्यक्ष सरल सहयात्रीले कीर्तिपुर वडा नं. १ मा अष्टमान महर्जन र वडा नं. ४ मा इन्जिनियर नारायण विष्टलाई उम्मेदवार बनाउने निर्णय भएको जानकारी दिनुभयो । उहाँले भन्नुभयो, “अन्य पालिकाका उम्मेदवार दुई दिनभित्र टुङ्गो लाग्छ ।” त्यसै गरी राष्ट्रिय प्रजातन्त्र पार्टीले ध्रुव महर्जनलाई नगरप्रमुखको उम्मेदवार बनाएको छ । अन्य साना दलले उम्मेदवारी दिने छलफल चलाए पनि उम्मेदवार तय गरिसकेका छैनन् ।  कांग्रेस, एमाले, माओवादी केन्द्रसहितका राजनीतिक दलले अन्य प्रदेशमा पनि पार्टीका स्थानीय समितिलाई उम्मेदवार सिफारिस गर्न निर्देशन दिइसकेका छन् । केन्द्रलाई उम्मेदवारको सूची प्राप्त भएपछि उम्मेदवार छनोट गर्ने दलहरूले जनाएका छन् ।

थप रिक्त पदको पनि मङ्सिर १६ मै 

निर्वाचन आयोगले स्थानीय तहको उपनिर्वाचनको मिति घोषणा भइसकेपछि रिक्त हुन पुगेका थप पाँच स्थानमा मङ्सिर १६ गते नै उपनिर्वाचन गर्ने भएको छ । मन्त्रीपरिषद्को भदौ ३० गतेको बैठकले स्थानीय तहमा रिक्त रहेका पदको मङ्सिर १६ गते आइतबार उपनिर्वाचन गर्ने निर्णय गरेको थियो । 

आयोगका सहायक प्रवक्ता दुर्गा चालिसेले भदौ अन्तिम र त्यसपछि रिक्त हुन पुगेका पाँच स्थानीय तहमा तोकिएकै मितिमा उपनिर्वाचन हुने जानकारी दिनुभयो । निर्वाचन आयोगले मतदाताको अन्तिम नामावली प्रकाशन हुनुअघिसम्म रिक्त हुने पदको मङ्सिर १६ गते नै उपनिर्वाचन गर्ने  प्रस्ट्याएको छ । सहायक प्रवक्ता चालिसेले कात्तिक २६ गते मतदाताको अन्तिम नामावली प्रकाशन हुने जानकारी दिनुभयो ।