अनिल पराजुली
हेटौँडा, कात्तिक १९ गते । मकवानपुरको बागमती गाउँपालिका वडा ४ मा स्कुटरले ठक्कर दिँदा एकजना पैदलयात्रीको मृत्यु भएको छ । एकजना घाइते हुनुभएको छ ।
सोमबार ४ बजेर २० मिनेटको समयमा स्कुटरको ठक्करबाट पैदलयात्री बागमती गाउँपालिका–४ बस्ने ४८ वर्षिया गङ्गा पहरीको उपचारको क्रममा मृत्यु भएको हो । उहाँको नाति ५ वर्षीय अनुप पहरी घाइते हुनुभएको छ ।
मकवानपुरको बकैया–४ हरामिटोलमा हेटौँडाबाट सिन्धुलीतर्फ जाँदै गरेको बागमती प्र.०३–००४प ७२७६ नम्बरको स्कुटरले बाटो काट्दै गरेका पैदल यात्रीलाई ठक्कर दिएको जिल्ला प्रहरी कार्यालय मकवानपुरका निमित्त प्रहरी प्रवक्ता प्रहरी निरीक्षक ठाकुरप्रसाद सापकोटाले जानकारी दिनुभयो ।
स्कुटरको ठक्करबाट गम्भीर घाइते हुनुभएका गङ्गाको उपचारको क्रममा सीएमसी चुरेहिल अस्पताल हेटौँडामा मृत्यु भएको प्रहरीले जनाएको छ । घाइते बालकको उपचार भइरहेको छ । उहाँको टाउकोमा चोट लागेको छ । ठक्कर दिने स्कुटर र चालक हेटौँडा उपमहानगरपालिका–६ चौघडा बस्ने २६ वर्षीय अनुपकुमार क्षेत्री प्रहरी नियन्त्रणमा छन् ।
