गोरखापत्र समाचारदाता
काठमाडौँ, कात्तिक १५ गते । शिवप्रसाद जैसीद्वारा लिखित कथासङ्ग्रह ‘घटको रैबार’ को विमोचन गरिएको छ । काठमाडौँमा आयोजित एक कार्यक्रमबिच समालोचक प्राडा दयाराम श्रेष्ठ ‘सम्भव’ ले पुस्तकको लोकार्पण गर्नुभएको हो । कार्यक्रममा प्राडा श्रेष्ठले आफूले पढेका कैयौँ कथामध्ये सो कथासङ्ग्रह फरक भेटिएको बताउनुभयो । कथा सङ्ग्रहभित्र नयाँपन रहेको उहाँको भनाइ छ । पूर्वमन्त्री एवं नेकपा एमालेका उपमहासचिव प्रदीप ज्ञवाली, गीतकार शङ्कर कोइराला, पूर्वमन्त्री शेरबहादुर कुँवर, साहित्यकार नरनाथ लुइँटेल, पूर्ण रावल, साहित्यकार प्रह्लाद पोखरेल र प्रकाशकको तर्फबाट भुँडीपुराणका केशव पराजुलीले लेखकको व्यक्तित्व र कृतिमाथि प्रकाश पार्नुभएको थियो । कार्यक्रममा लेखक जैसीले कथा लेख्ने प्रेरणा आफूले बाल्यकालदेखि नै विभिन्न परिस्थितिबाट पाएको बताउनुभयो ।
