सामान चोरी गर्ने महतो पक्राउ

अर्जुन काफ्ले
स्याङ्जा, भदौ १८ गते । फर्निचर उद्योगबाट सामान चोरी गरी फरार रहेका एक जनालाई प्रहरी पक्राउ गरेको छ ।

हरिनास गाउँपालिका–२ पुछौदीमा ५० वर्षीय बालकृष्ण सिग्देलले सञ्चालन गरेको होमिक्स समितल फर्निचर उद्योगबाट चोरी गरेर फरार भारत बिहार राज्य बेतियाग्राम पन्चायत ईनर्वा–५ बस्ने ३० वर्षीय मनोजकुमार महतोलाई प्रहरीले पक्राउ गरेको हो ।

शुक्रबार महतोले फर्निचर उद्योगमा रहेका जेनरेटर, कम्प्रेसर मेसिन, खराद मेसिन, रन्दा कटर साईजर मेसिन डाईनामो, नट बोल्ट खोल्ने रिन्चिहरू चोरी गरेर फरार भएका थिए ।

फरार भएका महतोलाई स्याङ्जा प्रहरीले पर्सा वीरगञ्ज महानगरपालिका –१६ वीरगञ्ज बसपार्कबाट पक्राउ गरिएको र सामानहरु समेत बरामद गरेको प्रहरी नायब उपरीक्षक इन्द्रबहादुर रानाले जानकारी दिनुभयो ।

डिएसपी रानाले पक्राउ परेका महतोलाई चोरी तथा डाँकासम्बन्धी कसूर मुद्दा दर्ता गरी आवश्यक अनुसन्धान कार्य अगाडि बढाएको बताउनुभयो ।