चन्द्र पन्दाक
ताप्लेजुङ, साउन २५ गते। यही भदौ ३ गतेदेखि सुरु हुने अन्तर्राष्ट्रिय आमन्त्रण ताप्लेजुङ गोल्डकप फुटबल प्रतियोगिताको खेल तालिका सार्वजनिक गरिएको छ। प्रतियोगितामा आठ टोली सहभागी हुने निश्चित भएसँगै आयोजकले खेल तालिका सार्वजनिक गरेको हो।
आयोजक लाखेजात्रा सञ्चालन समितिले शुक्रबार सार्वजनिक गरेको खेल तालिकाअनुसार चार–चार टोली रहेको दुई समूहबिच प्रतिस्पर्धा हुने छ। समूह ‘ए’ अन्तर्गत प्रिक्वार्टर खेलमा स्थानीय सङ्घर्ष स्पोर्टिङ युवा क्लब र कञ्चनजङ्घा फुटबल क्लब सिलिगुढी भारतबिच प्रतिस्पर्धा हुने भएको छ। यस्तै सोही समूहको अर्को बुटवल लुम्बिनी फुटबल क्लब रुपन्देही र सगरमाथा युथ क्लब मोरङबिच हुने छ।
यस्तै समूह ‘बी’अन्तर्गत पाँचथर फुटबल क्लब पाँचथर र सलहेश युवा क्लब सिराहाको प्रिक्वार्टरमा स्पर्धा हुने छ। बी समूहकै अर्को खेल त्रिभुवन आर्मी फुटबल क्लब काठमाडौं र विर्तामोड युनाइटेड फुटबल क्लब झापाबिच हुने आयोजकले जनाएको छ। लाखेजात्रा सञ्चालन समितिका अध्यक्ष गुरुङका अनुसार प्रतियोगितामा एक जना फिफा रेफ्री, दुई जना राष्ट्रिय रेफ्रीसहित छ जना रहने छन्।
यसवर्ष प्रतियोगिता विजेताले ट्रफी, मेडल, प्रमाणपत्रसहित पाँच लाख ५५५ रुपियाँ राशिको नगद पुरस्कार पाउने छ। त्यस्तै उपविजेताले दुई लाख ५० हजार ५५५ रुपियाँ नगद पुरस्कार प्राप्त गर्ने छ। यता प्रतियोगिताको समय नजिकिएसँगै तयारी तीब्र रुपमा भइरहेको पनि समिति अध्यक्ष गुरुङले बताउनुभयो। उहाँकाअनुसार बाँसको प्रयोग गरी अस्थायी प्याराफिट (दर्शकदिर्घा) निर्माणको कामलगायत तयारी धमाधम भइरहेको छ। प्रतियोगिता भदौ १० गते सम्पन्न हुने छ।
