.jpg)
प्रेम अधिकारी
पशुपतिनगर (इलाम), वैशाख १६ गते । इलाम निर्वाचन क्षेत्र नं. २ मा नेकपा (एमाले) र नेपाली कांग्रेसबिचमा प्रतिस्पर्धा हुने देखिएको छ । आइतबार दिउँसोबाट सुरु भएको मतगणना जारी रहँदा ठुला दुई दलबिचमा मुख्य प्रतिस्पर्धा हुने सङ्केत गरेको हो । इलामको फाकफोकथुम गाउँपालिका १ बाट मत गणना सुरु गरिएको छ ।
फाकफोकथुमको मत गणना सक्दा एमालेका सुहाङको अग्रता कायम छ । चुलाचुली, माङसेबुङ गाउँपालिका हुँदै माई नगरपालिकाका ३ वटा वडाको तथा देउमाई नगरपालिका र अन्तिममा इलाम नगरपालिकाको मत गणना हुने मुख्य निर्वाचन अधिकृत केशव घिमिरेले जानकारी दिनुभयो ।
शनिबार दिउँसोबाट सुरु गरिएको गणना सुस्त गतिमा छ । नेकपा (एमाले) इलामका सचिव उमेश गुरुङले मतगणना ढिलोगरी सुरु भएकाले पूरा परिणाम आउन समय लाग्ने बताउनुभयो ।
एमालेले लामो समयदेखि विजय हासिल गर्दैआएको इलाम २ मा २०७९ को प्रतिनिधि सभा निर्वाचनमा सभामुख सुभाषचन्द्र नेम्वाङसँग कांग्रेस उम्मेदवार डम्बर खडका १ सय १४ मतले मात्र पराजित हुनु भएको थियो ।
उच्च सुरक्षाबिच इलामको गौतमबुद्ध सभा हलमा मतगणना जारी रहेको मुख्य निर्वाचन अधिकृत घिमिरेले जानकारी दिनुभयो । मतगणना स्थलमा बाक्लो सुरक्षाकर्मी परिचालन गरिएका छन् । मतगणना स्थलमा तार जालीसहित सिसिटिभी जडान गरिएको छ ।
मतगणना स्थलमा मतपरिणाम सार्वजनिक गर्ने कार्यलाई व्यवस्थित गरिएको इलामका प्रमुख जिल्ला अधिकारी इन्द्रदेव यादवले जानकारी दिनुभयो । मतगणनास्थलमा सञ्चारकर्मीका लागि डेक्स स्थापना गरिएको छ । मंगलबार बिहान सम्ममा सबै परिणाम आउने निर्वाचन कार्यालयले जनाएको छ ।
शनिबार सम्पन्न उपनिर्वाचनमा एक लाख १५ हजार आठसय ८९ जना मतदाता मध्ये ६९ हजार दुईसय ८७ (५९ दशमलव ७९ प्रतिशत) मतदाताले मतदान गर्नुभएको छ ।
संविधान सभाका अध्यक्ष सुभाषचन्द्र नेम्वाङको निधन भएपछि इलाम २ मा उपनिर्वाचन भएको हो । इलाम २ मा एमालेबाट नेम्वाङका छोरा सुहाङ नेम्वाङ, कांग्रेसका डम्बरबहादुर खड्का, राष्ट्रिय स्वतन्त्र पार्टीका मिलन लिम्बु र पहिचानवादी डकेन्द्रसिंह थेगिमसहित स्वतन्त्र र राजनीतिक दलका गरी १९ जना उम्मेदवार रहनुभएको छ ।
