बेइजिङ, वैशाख ६ गते । भ्रष्टाचारविरुद्धको एक दशक लामो कारबाहीको पछिल्लो घटनामा चीनको केन्द्रीय बैङ्कका एक पूर्वडेपुटी गभर्नरमाथि उच्च पदस्थ अधिकारीका रूपमा आफ्नो कार्यकालमा ठुलो घुस लिएको आरोप लगाइएको सरकारी सञ्चारमाध्यमले बिहीबार बताएको छ ।
फ्यान यिफेई पहिलो पटक सन् २०२२ नोभेम्बरमा ‘अनुशासन र कानुनको संदिग्ध उल्लङ्घन’ का लागि अनुसन्धानको दायरामा आउनुभएको थियो । उक्त शब्द सामान्यतया कथित भ्रष्टाचारका घटनाहरूमा प्रयोग गरिन्छ । एक दशकअघि सत्तामा आएपछि चिनियाँ राष्ट्रपति सी जिनपिङले सरकारी भ्रष्टाचारविरुद्ध व्यापक कारबाही अभियान सुरु गर्नुभएको छ ।
चिनियाँ राज्य प्रसारक सिसिटिभीले फ्यानमाथि अहिले गैरकानूनीरूपमा ‘३८ करोड ६० लाख युआन (पाँच करोड ३० लाख अमेरिकी डलर)भन्दा बढीको सम्पत्ति’ प्राप्त गरेको आरोप लगाइएको बताएको छ । यी गैरकानूनी गतिविधिहरू कथितरूपमा सन् १९९३ देखि सन् २०२२ को बिचमा भएको समाचारमा उल्लेख छ ।
बिहीबार मध्य प्रान्त हुबेईमा घुसखोरी मामिलमा प्रारम्भिक सार्वजनिक सुनुवाइपछि अदालत स्थगित गरिएको र फैसलाको घोषणा पछि गरिने सिसिटिभीले बताएको छ ।
सत्तारूढ कम्युनिष्ट पार्टीको आन्तरिक भ्रष्टाचार विरोधी एजेन्सीले सन् २०२३ जुनमा ‘व्यावसायिक कर्तव्यको गम्भीर उल्लङ्घन’ गरेको भन्दै फ्यानले घुस लिएको आशङ्का गरिएको बताएको थियो । केन्द्रीय अनुशासन निरीक्षण आयोगले सो बेला फ्यानलाई सार्वजनिक पदबाट बर्खास्त गरिएको, उनको गैरकानुनी आम्दानी जफत गरिएको र फौजदारी मुद्दा चलाइएको बताएको थियो ।
समर्थकहरूले राष्ट्रपति सीको भ्रष्टाचार विरोधी अभियानले स्वच्छ शासनलाई बढावा दिने बताए पनि आलोचकहरूले उक्त अभियान सीका लागि राजनीतिक प्रतिद्वन्द्वीहरूलाई हटाउने माध्यम भएको बताएका छन् ।
भ्रष्टाचार नियन्त्रण अभियान हाल चीनको वित्तीय र बैङ्किङ क्षेत्रमा हाबी भएको छ । सरकारी स्वामित्वको चाइना डेभलपमेन्ट बैङ्कका पूर्वउपप्रमुख ली जिपिङ गत महिना अनुसन्धानको दायरामा आउनुभएको थियो भने सरकार समर्थित चाइना मर्चेन्ट्स बैङ्कका पूर्वप्रमुख तियान हुइयुलाई फेब्रुअरीमा घुस लिएको आरोपमा निलम्बित मृत्युदण्डको सजाय दिइएको थियो । रासस/एएफपी
