काठमाडौँ, वैशाख ४ गते । सरोकारवालाहरूले विधेयक निर्माण गर्दा आदिवासी जनजाति महिलाका विषय प्राथमिकतामा साथ राख्न सरोकारवालाले माग गर्नुभएको छ । प्रतिनिधि सभाको महिला तथा सामाजिक मामिला समितिले आयोजना गरेको छलफलमा राष्ट्रिय आदिवासी जनजाति महिला मञ्चकी उपाध्यक्ष यसो कान्ति भट्टचन(गौचन)ले आदिवासी जनजाति महिलाका विषय प्राथमिकतामा राख्न सुझाव दिनुभयो ।
आदिवासी महिला तथा किशोरीको अधिकार सम्बन्धमा संयुक्त राष्ट्र सङ्घीय महिलाविरुद्ध हुने भेदभाव उन्मुलन समिति(युएन सिड कमिटी) आधारभूत सिफारिस नम्बर ३९ सम्बन्धमा धारणा राख्ने क्रममा उहाँले महिलाविरुद्धका सबै प्रकारका भेदभाव उन्मुलन गर्ने सम्बन्धी महासन्धी (सिड) सिफारिस राज्यपक्षीय विधायिका, नीति निर्माण गर्ने तह तथा सम्बन्धित सबैलाई मार्ग निर्देशनको रूपमा रहेको बताउनुभयो ।
नयाँ विधेयक बनाउँदा वा मस्यौदा विधेयकमा संशोधन गर्दा सिडको सिफारिससँग मिल्ने गरी बनाउने आधार वा मार्गनिर्देशनको रूपमा प्रयोग गर्न उहाँले सुझाव दिनुभयो । उहाँले भन्नुभयो, “आदिवासी अधिकारसम्बन्धी संयुक्त राष्ट्र सङ्घको घोषणापत्रअनुरूप आदिवासी महिलाको अधिकार, विशेष गरी उनीहरूको आत्मनिर्णयको अधिकार स्पष्टरुपमा पहिचान गर्न संविधान संशोधन गर्ने भनी गरेको सिफारिसलाई विधायिकाहरूले प्राथमिकता दिनुपर्छ ।” मञ्चकी अध्यक्ष सुनी लामाले आदिवासी जनजाति महिला हरेक क्षेत्रमा पहुँचभन्दा बाहिर रहेको र उनीहरूको अधिकारको सुनिश्चितता हुनुपर्ने धारणा राख्नुभयो ।
उहाँले आदिवासी महिलाको अधिकार दाबी गर्न सिडको सिफारिस कार्यान्वयनको सम्बन्धमा सांसदहरूको दायित्व रहेको बताउनुभयो । सांसद रोशन कार्कीले प्रवासमा जाने महिला कामदार बढी शोषित भइरहेका र उनीहरूको विषयमा पनि आवाज उठाउनुपर्ने बताउनुभयो । उहाँले अन्तरजातीय विवाहले संस्कृति हराउँदै गएको हो की भन्ने चिन्ता प्रकट गर्नुभयो । सांसद शान्ति विकले आदिवासी जनजाति महिला मात्र होइन सबै महिला पीडित रहेको जिकिर गर्नुभयो । उहाँले भन्नुभयो, “आदिवासी जनजाति महिला बढी एकतामा बाँधिएका हुन्छन् जुन अरू समुदायमा त्यति पाइँदैन । सीमान्तकृत महिलाहरूको हक अधिकारको सुनिश्चितता हुनु जरुरी छ ।” रासस
