सुजन काफ्ले
चरीकोट, चैत २३ गते । दोलखाको कालिन्चोक गाउँपालिकामा ट्याक्टर दुर्घटना हुँदा १ जनाको मृत्यु भएको छ । गाउँपालिकाको वडा नम्बर-३ मा शुक्रबार बिहान १० बजे सोही वडाको पुटिस्याङबाट सिगटी जाँदै गरेको ट्याक्टर दुर्घटनामा करिब ३७ वर्षीय सन्चीमाया थामीको मृत्यु भएको हो भने चार जना घाइते भएका छन् ।
घाइते हुनेहरुमा अन्दाजी १७ वर्षीय अस्मिता थामी, ३० वर्षीय बालकुमारी थामी, ३ वर्षीय बालिका टुकि थामी र ३० वर्षीय निशा थामी रहेको जिल्ला प्रहरी कार्यालय दोलखाका सूचना अधिकारी जीवन श्रेष्ठले बताउनुभयो ।
लु ३ त १७१४ नम्बरको खाली ट्याक्टर सडकबाट अन्दाजी ३५ मिटर तल खेतमा खसी दुर्घटना भएको उहाँले बताउनुभयो । इलाका प्रहरी कार्यालय सिंगटीमा दुर्घटनाको सूचना प्राप्त भएपछि प्रहरी टोलीले घाईतेहरुलाई उद्धार गरी उपचारको लागि धुलिखेल शाखा अस्पताल भिमेश्वर भइरहेको प्रहरिले जनाएको छ ।
ट्याक्टर चालक गौरीशंकर गाउँपालिका ५ बस्ने अन्दाजि २२ वर्ष अबराम थामीलाई नियन्त्रणमा लिइएको श्रेष्ठले बताउनुभयो ।
