फिक्कल (इलाम), चैत १७ गते । उपप्रधानमन्त्री तथा गृहमन्त्री रवि लामिछानेले कुनै पनि दबाब र प्रभावमा नपरी काम गर्न इलामस्थित सुरक्षा निकायलाई निर्देशन दिनुभएको छ । इलामस्थित प्रमुख जिल्ला अधिकारी तथा जिल्लाका सुरक्षा प्रमुखसँग गरिएको छलफलमा उहाँले जनताले अनुभूत गर्ने खालको काम गर्न निर्देशन दिनुभएको हो ।
गृहमन्त्री लामिछानेले शान्ति, सुरक्षा तथा सुव्यवस्था कायम राख्न एवम् अपराध नियन्त्रणमा कुनै सम्झौता नगर्न निर्देशन दिनुभयो । “तपाईँहरू कोही कसैको दबाब र प्रभावमा नपरी काम गर्नुहोला, कानुन पल्टाउँदा जे भन्छ त्यही गर्नुहोला, कानुनबमोजिम काम गर्न गृहमन्त्रीको निर्देशन र आदेश पर्खिरहन पर्दैन”, उहाँले भन्नुभयो, “तपाईँहरूको अबको प्रगति विवरण कागजमा होइन, तथ्याङ्कमा आउनुपर्यो ।”
सेवा प्रवाहमा नागरिकको गुनासो नआउने गरी काम गर्न गृहमन्त्री लामिछानेले निर्देशन दिनुभयो । उहाँले पीडितको पक्षमा राज्य छ भन्ने अनुभूत हुनेगरी सेवा प्रवाह गर्नुपर्नेमा जोड दिनुभयो । “तपाईँहरूले कानुनको पालना गराउनुहोस्, कानुनविपरीत काम गर्ने छुट कसैलाई छैन”, उहाँले भन्नुभयो ।
गृहमन्त्री लामिछानेले आफूहरू जनताका लागि काम गर्न सरकारमा सहभागी भएको उल्लेख गर्दै मन्त्रालय मातहतका निकायले प्रगति विवरण कागजले बोल्ने, मन्त्रीले अनुभूत गर्ने खालको नभई जनताले परिवर्तन भयो भन्ने प्रत्यक्षता महसुस हुने गरी काम गर्न निर्देशन दिनुभयो । उहाँले सुशासन, सेवा प्रवाह, भ्रष्टाचार नियन्त्रण, लागूऔषध एवम् अवैध चोरीनिकासी नियन्त्रणमा विशेष ध्यान दिएर काम गर्नुपर्नेमा जोड दिनुभयो ।
इलाम क्षेत्र नम्बर २ को उपनिर्वाचनमा राष्ट्रिय स्वतन्त्र पार्टीका तर्फबाट औपचारिकरुपमा उम्मेदवारी घोषणा गर्ने कार्यक्रममा सहभागी हुन गृहमन्त्री लामिछाने इलाम आउनुभएको हो । रास्वपाले उक्त क्षेत्रमा मिलन लिम्बूलाई उम्मेदवार बनाउने निर्णय गरेको छ । यसअघि उहाँ आजै किराँत धर्मगुरु आत्मानन्द लिङ्देनलाई भेट्न माङ्सेबुङ-५ लारुम्बा पुग्नुभएको थियो । रासस
