गुणबहादुर रोका
सुलीकोट, चैत १७ गते । नेपाली सेनाले चैत २७ गतेबाट दोस्रो ऐतिहासिक गोरखा-जितगढी एकीकरण पदयात्रा सुरु गर्ने भएको छ । ऐतिहासिक कोट, गढी, किल्लाहरूको संरक्षण गर्न र इतिहास जोगाउने लक्ष्यका साथ गोरखा-जितगढी एकीकरण पदयात्रा सुरु गरिएको नेपाली सेनाको रिपुमर्दन गणका गणपति अशोक कुमार क्षेत्रीले बताउनुभयो ।
गोरखा-जितगढी यात्रामा नेपाली सेनाको अधिकृतको कमाण्डमा ४८ जना सेना सहभागी हुनेछन् । पृथ्वीनारायण शाहले तत्कालीन समयमा खडा गरेको ५ पल्टन कालीबक्स, सबुज, श्रीनाथ, बर्दबाणी र पुरानो गोरख र जितगढीको लडाइमा भाग लिएका गुरुबक्स पल्टनका टोली सहभागी हुन्छन्, ‘उहाँले भन्नुभयो, आ-आफ्नो पल्टनको झण्डासहित यात्रामा निस्कन्छन् ।’
गोरखाको टोली पालुङटारको सतिघाट पुगेर तनहुँलाई हस्तान्तरण गर्ने र तनहुँले पाल्पालाई हस्तान्तरण गर्ने कार्यक्रम रहेको उहाँले जानकारी दिनुभयो । पाल्पाले रुपन्देहीलाई बुझाउँछ र रुपन्देहीको टोली जितगढी पुगेर विजय उत्सवमा सहभागी हुन्छन् । रिपुमर्दन गणका गणपति क्षेत्रीका अनुसार नेपाल र तत्कालीन ब्रिटिस इस्ट इन्डिया कम्पनीबिच भएको लडाइमा विजय प्राप्त गरेको दिन वैशाख ७ गतेलाई विजय उत्सको रूपमा मनाउँदै आएको छ ।
सोही उत्सवमा सहभागी हुने गरी पदयात्रा सुरु गर्न लागिएको बताइएको छ । चैत २७ गते औपचारिक कार्यक्रम गरी गोरखा दरबारबाट पदयात्रा सुरु हुने गणपति क्षेत्रीले बताउनुभयो । नेपाली सेनाले ११ दिनको दिनमा जितगढीसम्मको दुई सय सात किलोमिटर दुरी पार गर्ने उहाँले जानकारी दिनुभयो । यो यात्राले गोरखादेखि जितगढसम्म पर्यटन प्रबन्धनमा मद्दत पुग्ने अपेक्षा गरिएको छ । गोरखाको पर्यटन प्रवर्द्धनमा एकीकरण पदयात्राले समग्र गोरखालाई फाइदा हुने भएकाले स्थानीय तहहरूले सहजीकरण गरेको गोरखा नगरपालिकाका मेयर कृष्ण बहादुर राना मगरले जानकारी दिनुभयो ।
यात्रामा सहभागीलाई हरेक स्थानीय तह र जिल्लाको सिमानामा जनप्रतिनिधि, सुरक्षा निकायका प्रमुखहरू सहितको उपस्थितमा बिदाइ गरिने भएको छ । गोरखा-जितगढी यात्रालाई सफल बनाउन गोरखामा रहेका ११ वटै स्थानीय तहहरूसँगको समन्वयमा कार्यक्रम आयोजना गरिएको रिपुमर्दन गण गोरखाले जनाएको छ । गोरखाबाट सुरु हुने पदयात्रा तनहुँ पाल्पा हुँदै जितगढी पुगेर समापन हुने रिपुमर्दन गणका गणपति क्षेत्रीले जानकारी दिनुभयो ।
