• गोरखापत्र
• ११ जेठ २०७९, बुधबार

मटिहानी नगरमा वारुणयन्त्र खरिद तथा कक्षा ११ का छात्रालाई साइकल दिने

महेशकुमार दास जलेश्वर, जेठ ११ गते । मटिहानी नगरपालिकामा दोस्रो पटक प्रमुखको पदभार ग्रहण गर्नु भएका हरिप्रसाद मण्डलले पहिलो निर्णयमा वारुणयन्त्र खरिद गर्ने र कक्षा ११ मा अध्ययनरत छात्रालाई साइकल वितरण गर्ने निर्णय गर्नुभएको छ । बुधबार दोस्रो कार्यकालको जिम्मेवारी लिँदै प्रमुख मण्डलले दुई वटा निर्णयमा हस्ताक्षर गरी स्वीकृत गर्नुभएको हो ।ती दुई निर्णय मध्ये नगर क्षेत्र भित्र हुने आगलागिका घटना न्युनिकरण गर्न वारुण यन्त्र खरिद गर्ने र नगर क्षेत्र भित्रका कक्षा ११ मा अध्ययनरत सम्पुर्ण छात्राहरुलाई साइकल वितरण गर्ने निर्णय गरिएको नवनिर्वाचित प्रमुख मण्डलले बताउनुभएको छ । पहिलो कार्यकालको मूल्यांकन गरेर यहाँका मतदाताले दोस्रो पटक पनि प्रमुख पदमा मतदान गरेर विजयी गराएकाले नगरक्षेत्र भित्रको विकास नै दोस्रो कार्यकाल पनि प्रमुख प्राथमिकता रहने उहाँले स्पष्ट पार्नुभयो । नगर प्रमुखको पदस्थापन पश्चात् बुधबार नै मटिहानी नगरपालिकाको नौ वटै वडाका अध्यक्षहरुलाई शथपग्रहण गराएर पदस्थापना गराइएको प्रमुख प्रशासकीय अधिकृत राजेश शर्माले बताउनुभयो ।