गोरखापत्र
बागलुङ नगरपालिकामा नयाँ सडक खन्न निषेध
बागलुङ नगरपालिकामा बागलुङमा नवनिर्वाचित जनप्रतिनिधिले नगर क्षेत्रको कुनै पनि स्थानमा नयाँ सडक विस्तार गर्न कामलाई निषेध गरेका छन् ।
सशस्त्र प्रहरीको वरिष्ठ हवलदारसहित चार जनालाई अदालतबाट पक्राउ पुर्जी जारी
शिवशङ्कर मिश्रबारा, जेठ १५ गते । सशस्त्र प्रहरीको एकजना वरिष्ठ हवलदारसहित चारजनाविरुद्ध पक्राउ पुर्जी जारी भएको छ । बारा जिल्ला अदालतले सशस्त्र प्रहरी बल मुख्यालय नम्बर–२ छिनमस्ता बाहिनी बर्दिवासका चारजना विरुद्ध पक्राउ पूर्जी जारी गरेको हो । इलाका प्रहरी कार्यालय सिम्रौनगढको माग बमोजिम सशस्त्र प्रहरी बल मुख्यालय नम्बर–२ छिनमस्ता बाहिनी बर्दिवासका सशस्त्र प्रहरी नायब महानिरीक्षक (डीआईजी) गणेश ठाडा मगरका घुमुवा सशस्त्र प्रहरी वरिष्ठ हवलदार अशोक साह सोनार, सशस्त्र प्रहरी हवलदार आत्माराम पटेल, सशस्त्र प्रहरी सहायक हवलदार रत्नसागर झा र सशस्त्र प्रहरी जवान सुनिलकुमार यादवविरुद्ध पक्राउ पूर्जी जारी गरिएको बारा जिल्ला अदालतले जनाएको छ । पैसा दिएर भारतबाट हतियार ल्याउँदै गर्दा दुईजना भारतीयलाई सशस्त्र प्रहरीले पक्राउ गरेको आरोपमा अनुसन्धान गर्न पक्राउ पूर्जी जारी गरिएको जिल्ला अदालतका श्रेस्तेदार नवराज जोशीले बताउनुभयो । जिल्ला प्रहरी कार्यालय बाराका प्रहरी नायब उपरीक्षक राजेश थापाले हतियार काण्डमा नाम मुछिएपछि सशस्त्र प्रहरीका चार जनालाई बोलाएर एकपटक बयान लिएर हाजिरी जमानतमा छोडिएको बताउनुभयो । सशस्त्र प्रहरीका चारजना घुमुवाले भारतीय नागरिक लालबाबु कुश्वाहालाई पैसा दिएर हतियार खरिद गराई दुईजना भारतीयलाई नेपाल बोलाएर हतियारसहित पक्राउ गरेको बयानबाट खुलेपछि उनीहरुविरुद्ध पक्राउ पुर्जी जारी भएको प्रहरीले जनाएको छ । सशस्त्र प्रहरीले गएको वैशाख २३ गते भारतको पूर्वी चम्पारणको लौखानका २३ वर्षीय पप्पुकुमार यादव र अखिलेश कुमार सिंहलाई सिम्रौनगढ नगरपालिका–१० बाट बी.आर.०१ सी १३६१ नम्बरको मोटरसाइकलमा सवार रहेको अवस्थामा दुई थान पेस्तोल र चार राउन्ड गोलीसहित पक्राउ गरेको थियो । पक्राउ परेका दुबैजना भारतीय युवकलाई सशस्त्र प्रहरीका घुमुवाले हतियार खरिद गर्न पैसा दिएका भारतीय नागरिक लालबाबु कुश्वाहाले पठाएको बयानबाट खुलेको प्रहरी स्रोतले जनाएको छ । सशस्त्र प्रहरीका (डीआईजी) गणेश ठाडा मगरले सशस्त्र प्रहरीका घुमुवा र हतियार सहित पक्राउ परेका भारतीय व्यक्तिहरुको मोबाइल कलको विस्तृत विवरण र बयान फेर्न दबाब दिइरहेको स्रोतले दाबी गरेको छ ।
'बाबरी'को टिजर सार्वजनिक
काठमाडौं, जेठ १५ गते । नेपाली फिल्म 'बाबरी'को टिजर सार्वजनिक गरिएको छ । अदिति बुढाथोकी र धीरज मगरको मुख्य भुमिका रहेको फिल्मको टिजरमा धीरज र अदितिको प्रेम देखाउन खोजिएको हो ।फिल्मलाई सुरेन्द्र पौडेलले निर्देशन गर्नुभएको हो भने अदिति र धिरजसँगै बादल भट्ट, कमणमणि नेपाल, उर्मिला बस्नेत, ध्रुव कोइराला, सुनिता श्रेष्ठ, नितेश गुरुङ, त्रिशला गुरुङ, दीलिप गुरुङलगायत कलाकारको अभिनय छ।बाबरी फिल्मको प्रस्तुति र सुष्मा प्रोडक्सनको ब्यानरमा निर्माण भएको फिल्मका निर्माता गणेश बुढाथोकी र पुष्पालता बुढाथोकी हुनुहुन्छ ।यस्तै, फिल्ममा कालीप्रसाद बास्कोटा, सुजन चापागाईँ र अनमोल गरुङको संगीत र एञ्जिला खत्री र विक्रम लामाको कोरियोग्राफी र नरेन्द्र मैनालीको छायांकन रहेको छ ।
नीति तथा कार्यक्रममा गृहमन्त्री खाणको क्रियाशीलता र प्राथमिकता
गृहमन्त्री बालकृष्ण खाणको पहलमा नेपाल सरकारका तर्फबाट राष्ट्रपति विद्यादेवी भण्डारीले १० जेठमा संघीय संसद्को दुवै सदनको संयुक्त बैठकमा पेस गरेको नीति तथा कार्यक्रममा विभिन्न दीर्घकालिन योजना समावेश भएका छन् ।
हराएकाे विमान खोजीका लागि नेपाली सेनाको हेलिकोप्टर सम्भावित क्षेत्रमा
पोखरादेखि जोमसोम उडेको तारा एयरको जहाज सम्पर्कविहीन भएपछि खोजी कार्य जारी छ । जहाज खोजीका लागि दुर्घटना आशङ्का रहेको क्षेत्रमा नेपाली सेनाको हेलिकोप्टर पोखराबाट मुस्ताङतर्फ उडेको छ ।
कान्समा 'लोरी'लाई स्पेशल मेन्सन अवार्ड
काठमाडौं, जेठ १५ गते । अविनाशविक्रम शाहले निर्देशन गर्नुभएको लघु फिल्म 'लोरी'ले चर्चित फिल्म फेस्टिभल कान्समा स्पेशल मेन्सन अवार्ड जितेको छ । १४ मिनेट लामो फिल्ममा बाल विवाहको विषयमा समेटिएको छ । यसअघि अविनाशकै फिल्म 'एलिफेन्ट इन दि फग' कान्सको मेन्टरसिप कार्यक्रमतर्फ छनोटमा परेको थियो । कान्सको ७५ औं संस्करणमा नेपालको प्रतिनिधि गरेको यस फिल्म पहिलो पटक कान्समा अर्वाड जित्न सफल भएको हो। अभिनेत्री सुरक्षा पन्तले सामाजिक सञ्जालमा लेख्नुभएको छ, 'बधाई छ अविनाशविक्रम शाह अनि लोरी टिम । पहिलो पटक कान्समा प्रदर्शन आएको फिल्मले स्पेशल मेन्सन अवार्ड जितेको छ ।'
-original-thumb.jpg)
पोखरा विमानस्थलमा आफन्तको भीड
सम्पर्कविहीन विमानमा सवार आफन्तका परिवार पोखरा विमानस्थलमा जम्मा भएका छन् । नेपाली सेनाको हेलिकोप्टर खोजी तथा उद्धारका लागि जोमसोम तर्फ प्रस्थान गरिसकेको छ ।
लोकस्टार सिजन-२ को डिजिटल अडिसन सुरु
काठमाडौं, जेठ १५ गते । लोक गायन रियालिटी शो नेपाल लोकस्टार सिजन-२ को डिजिटल अडिसन सुरु भएको छ । सबै प्रतिभालाई पहुँच दिने उद्देश्यले लोकस्टारमा यसपटक डिजिटल अडिसन सुरुवात गरिएको हो ।अडिसनको लागि आफ्नो मोबाइलमा गीतको भिडियो रेकर्ड गरेर हिमालय टीभीको एपमा अपलोड गरी अडिसनमा सहभागी हुन सकिने छ । यस्तै, एप चलाउन नसक्ने प्रतिभाहरुले आफ्नो भिडियो सिधै लोकस्टारको मोबाइल नम्बर ९८०१२३७८८० मा भाइबर वा ह्वाट्सएपमार्फत पठाउन पनि सकिने जनाइएको छ ।आफूलाई मन परेको कुनै पनि गीतको एक मिनेटसम्मको भिडियो रेकर्ड गरी अडिसनमा सहभागी हुन सकिनेछ । अडिसनमध्येबाट छानिएका एक सय जनालाई मेगा अडिसनमा सहभागी बनाइने छ । लोकस्टारमा ८ वर्षदेखि ७० वर्षसम्मका प्रतिभाहरुले प्रतिस्पर्धा गर्न पाउनेछन् ।विजेताले २० लाख रुपैयाँ नगद पुरस्कारसहित देश तथा विदेशका कन्सर्ट र चर्चित संगीतकार तथा एरेन्जरसँग गीत रेकर्डको अवसरसमेत पाउनेछन् ।
गुणस्तरीय बीउ समयमै उपलब्ध गराउन किसिनको माग
बाँके जिल्लाका किसानहरूले गुणस्तरीय बीउबिजन समयमै उपलब्ध गराउन सरकारसँग माग गरेका छन् ।
चित्रकला प्रतियोगिताका विजयीलाई नगदसहित पुरस्कार वितरण
गोरखापत्र अनलाइनकाठमाडौं, जेठ १५ गते । कोभिड –१९ र बालबालिका शीर्षकमा देशव्यापी भएको चित्रकला प्रतियोगिताका विजयी विद्यार्थीहरुलाई नगदसहित पुरस्कृत गरिएको छ ।यहाँस्थित राष्ट्रिय स्वास्थ्य तालिम केन्द्रमा भएको कार्यक्रममा स्वास्थ्य तथा जनसङ्ख्या राज्यमन्त्री भवानीप्रसाद खापुङले विजयी विद्यार्थीहरुलाई पुरस्कृत गर्नुभएको हो ।माध्यमिक तहमा गौरव सुनार, आयुष घिमिेर र कृष राना क्रमशः प्रथम, द्वितीय र तृतीय हुनुभयो भने प्रभात घिमिरे र कृतिमा महत्रालाई सान्त्वना पुरस्कार दिइएको छ ।यस्तै आधारभूत तहमा तुलसी थापामगर, सिजन श्रेष्ठ, मनिकाकुमारी कुशवाहा क्रमशः प्रथम, द्वितीय र तृतीय हुनुभयो भने अनिशा थापा र कशिश सुनुवारलाई सान्त्वना पुरस्कार दिइएकाे छ ।प्रथम, द्वितीय, तृतीय र सान्त्वना हुने विद्यार्थीहरुलाई क्रमशः जनही १५, १०, ५ र दुईहजार पाँचसय रुपियाँसहित पदक र प्रमाणपत्र प्रदान गरिएको थियो ।नेपाल स्वास्थ्य शिक्षा सङ्घ, राष्ट्रिय स्वास्थ्य शिक्षा सूचना तथा सञ्चार केन्द्र, त्रिभुवन विश्वविद्यालय रूपान्तरण परियोजना र शिक्षा तथा मानव स्रोत विकास केन्द्रकाे संयुक्त आयोजनामा कार्यक्रममा सञ्चालन भएको थियो ।
यार्साको सुरक्षामा खटिएका प्रहरीको हेलिकोप्टरमार्फत् उद्धार
राजु लामिछाने रुकुम पूर्व, जेठ १५ गते । रुकुम पूर्वमा पाईने बहुमुल्य जडिबुटी यार्सागुम्बाको सुरक्षाका लागि खटिएका एक प्रहरी बिरामी भएका छन् । जिल्लाको पुथा उत्तरगंगा गाउँपालिका १ मा रहेको इलाका प्रहरी कार्यालय मैकोटमा कार्यरत प्रहरी नायब निरीक्षक कुष्णबहादुर खड्का बिरामी हुँदा शनिबार बेलुका हेलिकप्टर मार्फत् उद्धार गरिएको हो । जिल्ला प्रहरी कार्यालय रुकुम पूर्वका प्रहरी नायब उपरिक्षक (डिएसपी) प्रकाश डाँगीले जिल्लाको पुथा उत्तरगंगा गाउँपालिका १ मैकोटमा यार्साको सुरक्षामा खटिएका प्रहरी नायब निरिक्षक खड्कालाई स्वासप्रश्वासमा समस्या भएको बताउनुभयो । शनिबार उहाँलाई हेलिकप्टरबाट सुर्खेत लगिएको हो । सुर्खेतबाट थप उपचारका लागि नेपालगञ्ज मेडिकल कलेज लगिएको र निमोनियाको समस्या देखापरेको डिएसपी डाँगीले जानकारी दिनुभयो । उच्च हिमाली भागमा अक्सिजन अभावको कारण ‘लेक लाग्ने’ समस्या हुने गर्दछ । मैकोटको पाटन, पुपालमा यार्साको सुरक्षामा खटिएका बेला खड्कालाई श्वासप्रश्वासमा समस्या देखिएको थियो । मैकोट, पुपाल क्षेत्रमा जेठ ८ गतेदेखि यार्सा संकलन सुरु भएको स्थानीयले जनाएका छन् ।
पाँच वर्षको सम्पूर्ण तलब/भत्ता सामाजिक कार्यमा
जिल्लाको बागचौर नगरपालिकाको निवर्तमान नगरप्रमुख लोकमान बुढाथोकीले आफूले सेवा, सुविधा (तलब/भत्ता) बापत प्राप्त हुने सम्पूर्ण रकम व्यक्तिगत रूपमा नलिएर सामाजिक कार्यमा खर्च गर्नुभएको छ ।
ट्याक्टरको ठक्करबाट साइकल यात्रुको मृत्यु
जानु पाण्डेकपिलवस्तु, जेठ १५ गते । कपिलवस्तुको बुद्धभूमि नगरपालिकामा ट्याक्टरको ठक्करबाट एक जनाको मृत्यु भएको छ । आज बिहान सवा १० बजे भएको दुर्घटनामा सोही नगरपालिका वडा नम्बर ३ का ५२ वर्षीय बालमुकुन्द चौधरीको घटनास्थलमा मृत्यु भएको छ ।नगरपालिकाको वडा नम्बर १ बनवामा लु ४ त २५४५ नम्बरको ट्याक्टरले साइकलमा सवार रहेका चौधरीलाई ठक्कर दिएको जिल्ला ट्राफिक प्रहरी कार्यालय कपिलवस्तुका प्रमुख प्रहरी निरीक्षक दलराम टमाटाले बताउनुभयो । घटनाको अनुसन्धानको लागि इलाका प्रहरी कार्यालय गोरुसिङ्गेको टोली खटिएको छ । दुर्घटनापछि ट्याक्टरचालक फरार रहेको प्रहरीले जनाएको छ ।
ध्वनि प्रदूषण गर्ने प्रेसर हर्न निकाल्ने अभियान
जिल्ला ट्राफिक प्रहरी कार्यालय नवलपुरले ध्वनि प्रदूषण गरेर प्रेसर हर्न बजाउने सवारी साधनको हर्न निकाल्न सुरु गरिएको छ ।
अध्यक्ष चढ्ने गाडी एम्बुलेन्सको रुपमा प्रयोग गर्न सुरु
चन्द्र पन्दाकताप्लेजुङ, जेठ १५ गते । ताप्लेजुङको फक्ताङ्लुङ गाउँपालिकाको गाडीलाई एम्बुलेन्सको रुपमा प्रयोग गर्न सुरु गरिएको छ । गाउँपालिका अध्यक्षले प्रयोग गर्ने अर्थात चढ्ने गाडी (सवारी साधन) लाई एम्बुलेन्सको रुपमा प्रयोग गर्न सुरु गरिएको हो । गाउँपालिकाको गाडी आफू नचढी एम्बुलेन्सको रुपमा प्रयोग गर्ने घोषणा गर्नुभएका नवनिर्वाचित अध्यक्ष राजन लिम्बू (मुक्ति) ले पालिकाको सवारी साधनमार्फत बिरामीको उद्दार गर्न थाल्नुभएको हो । आफू चढ्ने सवारी साधनमा चढाएर गाउँपालिका अध्यक्ष लिम्बू आफैँले शनिबार एक बिरामीलाई उपचारका लागि स्वास्थ्य संस्था पठाउनुभएको छ ।अध्यक्ष लिम्बूले फक्ताङ्लुङ गाउँपालिका–४ इखाबु खुपातालकी ६३ वर्षीया रामप्यारी लिम्बूलाई पालिकाको सवारी साधनमार्फत् ताप्लेजुङ जिल्ला अस्पतालसम्म पुग्ने प्रवन्ध मिलाउनुभएको हो । पथरिया र जन्डिसको समस्या भएकी बिरामी लिम्बूलाई छिरुवा बजारदेखि गाउँपालिकाको गाडी चढाएर जिल्ला अस्पताल पठाएको जनाइएको छ । नेपाल कम्युनिस्ट पार्टी (माओवादी केन्द्र) फक्ताङ्लुङ गाउँपालिका कमिटी अध्यक्षसमेत नवनिर्वाचित पालिका अध्यक्ष लिम्बूले आफ्नो निर्वाचन घोषणापत्रमै आफू चढ्ने गाडीलाई एम्बुलेन्स बनाउने भनी सार्वजनिक गर्नुभएको थियो । उहाँले निर्वाचित भएपश्चात पदभार ग्रहण गर्दै पालिकाका बासिन्दा कोही बिरामी भएमा सवारी साधनका लागि आफू सम्पर्क गर्न आह्वान गर्नुभएको थियो । उहाँको घोषणाअनुसारको योजना शनिबारदेखि कार्यान्वयनमा आएको पाइएको छ । यता, नवनिर्वाचित अध्यक्ष लिम्बूको घोषणा तथा प्रतिवद्धता कार्यान्वयनमा आएसँगै चौतर्फी प्रसंशा सुरु भएको छ । जिल्लाकै एक बिकट भौगोलिक क्षेत्र भएको फक्ताङ्लुङ गाउँपालिकाका अध्यक्ष चढ्ने गाडी एम्बुलेन्सका रुपमा प्रयोगमा आउनुले पालिकावासीका लागि ठूलो राहत पुगेको समाजका अगुवा बताउँछन् । त्यस्तै, स्थानीय जनताको सुविधाका लागि गाउँपालिको एक एम्बुलेन्स खरिद गर्ने योजना बनाएको पनि अध्यक्ष लिम्बूले जानकारी दिनुभयो ।
